Galicia solicita ao Estado actualizar o catastro e rexistrar as terras abandonadas

A directora xeral da Axencia Galega de Desenvolvemento Rural, Inés Santé, participou este xoves en Madrid na segunda reunión do Grupo de Traballo sobre a Mobilización de Terras Agrarias Infrautilizadas, integrado pola Administración central e as autonómicas. Alí, solicitouse impulsar a actualización do catastro e o rexistro da propiedade en terras abandonadas así como beneficios fiscais para a súa posta a producir.

Segundo informan nun comunicado, na reunión propuxéronse e debatido ideas entre o Ministerio de Agricultura, Pesca e Alimentación (MAPA) e as comunidades autónomas para colaborar na mobilización de terras abandonadas.

Ademais das propostas xa mencionadas, Santé reivindicou a experiencia galega na materia, centrada fundamentalmente no desenvolvemento da Lei de recuperación da terra agraria de Galicia e dos seus instrumentos, como son os polígonos agroforestais, as aldeas modelo, as permutas de especial interese agrario e as concentracións parcelarias.

Nesta liña, a directora xeral lembrou que en Galicia hai 21 polígonos agroforestais en diferentes fases desde a entrada en vigor da lei, "mobilizando case 9.000 hectáreas distribuídas nunhas 28.000 parcelas propiedade duns 7.500 veciños".

A Comunidade conta tamén con 21 aldeas modelo declaradas, así como con permutas promovidas no municipio lucense de Friol. Nos dous anos de vigor da lei, mediante diferentes instrumentos, mobilizáronse ao redor de 10.000 hectáreas de superficie de calidade en toda Galicia.

directora do Instituto de Estudos do Territorio, Inés Santé