Declarado un brote de gastroenterite en varias zonas de Betanzos
Realizan analíticas na auga aínda que non hai declarada alerta sanitaria.
Por Europa Press / Redacción | A CORUÑA | 29/05/2023 | Actualizada ás 17:33
A empresa concesionaria do servizo de abastecemento de auga en Betanzos está a realizar analíticas tras detectarse un brote de gastroenterite, segundo informa o consistorio. Do citado brote, precisa que afecta, principalmente, ao Centro Padre Menni e ao barrio da Condesa. En canto aos resultados das probas, indica que se coñecerán esta tarde.
Con todo, sinala que non hai declarada alerta santaria por parte de Sanidade, que iniciou este mediodía a recollida de auga en diferentes puntos, tanto da rede de traída como de fontes de manancial. As analíticas realizadas pola empresa concesionaria na estación potabilizadora, engade, "cumpren a normativa" e atópanse "dentro dos parámetros esixidos".
