Cal pode ser o uso da IA para detectar condutas suicidas en redes?
A enxeñeira galega Ana Freire abordará nunha conferencia esta probelmática.
Por E.P. | SANTIAGO DE COMPOSTELA | 06/06/2023 | Actualizada ás 11:31
A enxeñeira galega Ana Freire será a protagonista dun novo relatorio no 'Ciclo de Conferencias Aida Fernández Ríos' (promovida pola Real Academia Galega de Ciencias e a Deputación de Pontevedra) cunha charla este xoves ás 19,00 horas, en abordaraa o uso da Intelixencia Artificial para detectar condutas suicidas en redes sociais.
Ana Freire, profesora titular e vicedecana de Impacto Social e Innovación Académica da UPF Barcelona School of Management, da Universitat Pompeu Fabra, é a coordinadora do proxecto STOP (Suicide PrevenTion in social Platform), que analiza as redes sociais en busca de patróns asociados a diversas enfermidades mentais, prestando especial atención ao suicidio.
No marco deste proxecto, no que tamén participan universidades de Francia e Italia, os expertos estudan a expresión en redes sociais da depresión, as tendencias suicidas, e os trastornos de conduta alimentaria. "Mediante a análise do texto, imaxe e actividade, observamos factores que habitualmente o persoal especializado pregunta directamente aos seus pacientes: se teñen apoio social, a súa calidade do soño, posibles factores de risco...", explicou Ana Freire.
Estas características permiten a entrada de algoritmos de Intelixencia Artifical que se "adestran" para extraer patróns comúns en usuarios de alto risco. Esta información foi a base para lanzar campañas en Instagram e Facebook dirixidas a colectivos específicos, e conseguiuse "aumentar un 60 % o número de chamadas provenientes de redes sociais ao Teléfono de Prevención do Suicidio".
