Varios feridos nunha colisión frontal entre dous turismos en Noia

Unha colisión frontal entre dous turismos rexistrada en Noia saldouse con tres persoas feridas. O aviso chegou ao 112 Galicia a través do centro de emerxencias da marca dun dos vehículos implicados.

Pouco despois, era un particular que se atopaba no lugar o que trasladaba que dous turismos acababan de chocar frontalmente no quilómetro 69 da AC-550, en Barro (Noia). Engadía que, aínda que o choque fora de considerable magnitude, todas as persoas permanecían liberadas e accesibles.

Desde o 112 Galicia solicitouse a colaboración de Urxencias Sanitarias de Galicia-061, do GES de Noia, da Garda Civil de Tráfico e dos servizos de mantemento da estrada. Á súa vez, informouse os bombeiros de Boiro, que non tiveron que intervir.

Os efectivos do GES de Noia explicaron que unha das persoas tivo que ser evacuada en ambulancia ao centro hospitalario de referencia, mentres que as outras dúas serían levadas ao centro de saúde da localidade.

Accidente no corredor Brión-Noia, con tres vehículos implicados e provocou o corte desta vía que une Santiago con Noia | Fonte: remitida