Piden máis de 15 anos de prisión para un home que someteu a continuos malos tratos e abusos sexuais á súa muller
Tíñaa sometida a un "comportamento autoritario de control" co que trataba de illala da súa contorna
Por Europa Press / Redacción | SANTIAGO DE COMPOSTELA | 10/06/2023 | Actualizada ás 13:27
A Fiscalía da Coruña pide máis de 15 anos de prisión para un home acusado de maltratar e agredir sexualmente de forma reiterada á súa muller, á que tiña sometida a un "comportamento autoritario de control" co que trataba de illala da súa contorna.
A sección primeira da Audiencia da Coruña acollerá este luns, día 12, o xuízo por estes feitos, que o Ministerio Público pediu que se celebre a porta pechada para preservar a intimidade da vítima. Segundo recolle a acusación fiscal, a vítima presentou denuncia o 30 de abril de 2019, apuntando que o que era o seu marido sometéraa a continuos malos tratos.
Fiscalía considera que o acusado "mantiña sobre a vítima un comportamento autoritario de control e de menosprezo", co que pretendía "illala da súa familia e amigos, ata tal punto que infundou nela un ánimo medorento, de baixa autoestima pola súa condición de muller sometida". Ademais de sufrir malos tratos psicolóxicos e físico, "era obrigada a manter relacións sexuais co acusado".
Por iso, o fiscal pide para o procesado 12 anos de prisión por un delito continuado de agresión sexual, dous anos e medio por un delito de violencia habitual sobre a muller e nove meses por un delito de lesións.
Ademais, reclama que non poida achegarse ou comunicarse coa vítima durante un período de 15 anos e que a indemnice con 20.000 euros polos danos morais causados, así como que se faga cargo dos gastos médicos da súa asistencia.
