Que vai pasar en Galicia logo dos resultados do 23X?

Pode Madrid condicionar a axenda política galega?. Esa é a pregunta que na noite do domingo e a mañán deste luns estivo en boca de moitos e moitas xornalistas deste país que consideran que o que pasou o 23X ben pode ter unha lectura "á galega".  Unha lectura na que o PPdeG sae máis reforzado que nunca e no que a esquerda, novamente fragmentada en tres cachos, pode telo moi complicado para acceder a San Caetano. 

PPdeG, PSdeG e BNG adicaron este luns a facer valoracións dos resultados e, cada un deles, obviamente, barre para a casa. Populares e nacionalistas insistían en que aumentan en número de votos, e os socialistas en que conseguiron frear o ritmo descendente que se viu nas pasadas municipais.

Así, o voceiro do PPdeG, Pedro Puy, destacou que os populares galegos "reforzan as súas posicións", aínda que vitou facer especulacións sobre cando optará o presidente da Xunta, Alfonso Rueda, por fixar as autonómicas. Preguntado sobre un posible adianto se se repiten as xerais, respondeu que non toca abordar esta cuestión."Non é o momento para falar diso. O que procede constitucionalmente é elevar a proposta de candidato para a investidura. Isto é o fundamental", dixo.

O BNG SEGUE SUBINDO

Pola súa banda, a voceira do BNG, Ana Pontón, lamentou que a campaña fose "desigual" e "moi centralista", posto que a líder nacionalista argumentou que estivo centrada "nas forzas de carácter estatal" e sen que os temas galegos "tivesen o peso, a consideración e a importancia" que querían que tivesen. Con todo, destacou que o BNG é unha forza política "que segue subindo" con "30.000 votos máis nun contexto marcado polo bipartidismo".

Sobre unha hipotética extrapolación dos resultados das xerais a unhas autonómicas, foi clara: "Calquera persoa sabe que non se poden extrapolar uns resultados dunhas eleccións a outras". Así, expuxo que nos anteriores comicios o BNG tamén sacara un escano e nas eleccións galegas "triplicaron" o resultado e foron segunda forza política.

Ademais, a preguntas dos medios sobre se ve posible un adianto electoral en Galicia, Pontón sinalou que están "preparados para calquera adianto electoral", pero apuntou que esa é unha pregunta que "hai que facerlle ao presidente". Con todo, recoñeceu que "o vai a facer cando considere que é mellor para o PP, non cando considere que é mellor para Galicia".

ADIANTO ELECTORAL

Pola súa banda, o portavoz parlamentario do PSdeG, Luís Álvarez, afirmou que este domingo foi "a peor noite electoral" de Alberto Núñez Feijóo e asegurou que o candidato do Partido Popular "non vai ser presidente". Así mesmo, reiterou a insistencia dos socialistas en campaña "da importancia do voto útil". 

Cuestionado sobre un posible adianto electoral en Galicia, Álvarez ve tres escenarios: un "adianto técnico" en marzo, outro "menos plausible" que, na súa opinión, faría que a lexislatura terminase en xuño do próximo ano, ou a opción que para el "cobra cada vez máis forza", un adianto electoral. "Que Rueda convoque cando considere pertinente", engadiu antes de lembrar que "atoparán en fronte a un PSOE sendo primeira forza, tanto nas municipais como nestas xerais celebradas onte".