Naturgy inviste 100.000 euros para mellorar a subministración eléctrica en Boqueixón

UFD, a distribuidora eléctrica de Naturgy, investiu 100.000 euros en obras de mellora de instalacións eléctricas no municipio de Boqueixón. En concreto, a compañía está a ampliar a capacidade da rede de baixa tensión do lugar de Ardilleiro e adecuando o centro de transformación, co obxectivo de mellorar a calidade e seguridade da subministración eléctrica na parroquia da Granxa.

O delegado de UFD na Coruña, Emilio Castro, e o xefe de Operacións de Santiago, Fernando Fernández, acompañados do xefe territorial da Consellería de Economía, Emprego e Innovación da Xunta de Galicia, Isidoro Martínez Arca, e do alcalde de Boqueixón, Ovidio Rodeiro, visitaron as obras que se están executando no municipio e comprometéronse a seguir colaborando na mellora continua da calidade e garantía de subministración.

Nese sentido, Emilio Castro destacou que "o investimento realizado é unha proba máis do compromiso desta compañía co desenvolvemento enerxético de Boqueixón", xa que esta actuación "aumentará a capacidade da rede de distribución do municipio, ademais de mellorar a fiabilidade da subministración eléctrica e minimizar os tempos de resposta ante calquera incidencia no municipio".

A compañía inclúe cada ano no seu plan de investimentos actuacións e iniciativas para potenciar as infraestruturas de subministración de enerxía eléctrica e mellorar a rede de distribución eléctrica, especialmente en zonas rurais, contribuíndo así ao desenvolvemento económico destes territorios e á mellora das súas condicións de vida.

Parque eólico. NATURGY - Arquivo