A Xunta explora con Turismo de Galicia novas vías para impulsar o emprego no sector turístico

A Xunta de Galicia mantivo este luns unha reunión co Clúster Turismo de Galicia co obxectivo de afondar na colaboración entre administración e sector turístico para mellorar a inserción laboral e cubrir as necesidades actuais de persoal cualificado no ámbito do turismo galego.

Na xuntanza participaron o conselleiro de Emprego, Comercio e Emigración, José González, e o director de Turismo de Galicia, Xosé Merelles, ademais do presidente do Clúster, Cesáreo González Pardal, entre outros representantes institucionais. Durante o encontro analizáronse diferentes fórmulas para facer fronte aos retos laborais actuais, como a dificultade para cubrir vacantes en determinadas áreas e a necesidade dunha formación máis adaptada ao mercado.

González destacou algunhas das liñas activas por parte da Xunta, entre elas o impulso de programas formativos á carta orientados aos perfís profesionais que demanda o tecido produtivo, así como os incentivos á contratación e mellora da empregabilidade no marco das políticas activas de emprego.

No ámbito do comercio, o conselleiro puxo o foco no novo Plan Estratéxico do Comercio de Galicia 2025-2030, que propón accións conxuntas entre comercio e turismo, apostando por experiencias que vinculen o consumo local co patrimonio galego, tanto natural como histórico e cultural.

Pola súa parte, o director de Turismo de Galicia, Xosé Merelles, fixo fincapé nun novo programa formativo específico para o sector turístico, que busca profesionalizar o sector e atraer talento, especialmente en zonas con alta demanda de servizos ligados ao turismo.

Ambas partes coincidiron na necesidade de coordinación continua e na importancia de que o turismo galego avance cara a un modelo sostible e xerador de emprego de calidade. O Clúster Turismo de Galicia valorou positivamente o interese institucional e comprometeuse a trasladar as demandas concretas das empresas do sector.