A CIG reclama inspeccionar colexios do Opus en Galicia ante as "dúbidas" de que segreguen por sexo
A CIG sostén que estes colexios vinculados ao Opus Dei "abrirían a posibilidade de matrícula mixta só no primeiro curso de Primaria, alegando que no resto dos cursos de Primaria e ESO xa teñen alumnado a matrícula completa".
Por E.P. | SANTIAGO DE COMPOSTELA | 08/09/2023 | Actualizada ás 14:37
A CIG instou á inspección educativa da Xunta e á do Estado a vixiar que colexios ligados ao Opus Dei nas cidades da Coruña e Vigo cumpren coa lei ante as "dúbidas" de que este curso continúan segregando por sexo, algo prohibido coa LOMLOE.
Nun comunicado emitido este venres, o sindicato nacionalista manifestou as súas "sospeitas" de que os centros Montespiño e Peñarredonda na Coruña e As Acacias e Montecastelo en Vigo incumpren a lei "coa escusa" de que a matrícula para os cursos de infantil e primeiro da ESO "xa estaba pechada".
Sinala que estes centros pasan de 58 a 74 aulas de infantil concertadas respecto ao curso pasado nas que "si se mantén a segregación, do mesmo xeito que en 1º da ESO".
A CIG sostén que estes colexios vinculados ao Opus Dei "abrirían a posibilidade de matrícula mixta só no primeiro curso de Primaria, alegando que no resto dos cursos de Primaria e ESO xa teñen alumnado a matrícula completa".
Por tanto, apela á inspección educativa autonómica, da que dependen estes centros, e tamén á do Estado para vixiar se está a ser cumprida a normativa que exclúe aos colexios que segregan por sexo da posiblidad de subscribir concertos públicos.
A CIG, que solicitou información diferenciada por sexo sobre as matrículas, mostrou a súa vontade a permanecer "vixiante" para que "non se sigan financiando pola porta de atrás centros do Opus Dei que incumpran a norma e manteñan un espírito reaccionario de separación do alumnado por cuestión de xénero".
