Por Galicia Confidencial | Compostela | 11/09/2023 | Actualizada ás 12:15
A portavoz nacional do BNG, Ana Pontón, lanzouse a un novo formato en redes sociais co obxectivo de abordar as diferentes temáticas de actualidade e preocupacións da cidadanía cun formato distendido e con persoas referentes de cada un dos ámbitos, o que busca chegar a colectivos máis aló do 'corpiño' do discurso político tradicional.
Faino a través da apertura simultánea en redes sociais do que denominou #CódigoAna, no que, segundo as fontes nacionalistas, faranse charlas "francas e distendidas" con temas que "interesan e preocupan" á cidadanía e cos protagonistas, nunha cara a cara con Pontón, con quen se poderán sentir "identificadas ou interpeladas" outras persoas.
Trátase dun novo formato de comunicación a través das RRSS no que Ana Pontón comparte charla e reflexións con referentes de todos os ámbitos sociais. Nos próximos días coñecerase quen é a primeira persoa convidada en #CA.
Este novo salto de Pontón, que tamén foi a primeira política galega en lanzarse en TikTok buscando achegarse aos máis novos, quere desta maneira mostrar a súa faceta "máis humana e persoal" a través de conversacións con referentes do mundo da cultura, da ciencia, da economía, do audiovisual, do feminismo e de calquera ámbito que hoxe preocupe á sociedade galega.
Así as cousas, #CódigoAna arrinca este mes de setembro nas súas respectivas canles de Facebook, Instagram, X (antes Twitter) e Youtube. A emisión será regular, en función da axenda política da líder do Bloque.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.