Este luns arrinca a campaña anual de avaliación da calidade dos servizos de transporte público autonómico
As pescudas terán unha duración de sete semanas e incluirán enquisas aos usuarios, non usuarios e centros escolares con transporte integrado, xunto con observacións anónimas co modelo de cliente misterioso.
Por Europa Press / Redacción | SANTIAGO DE COMPOSTELA | 17/09/2023 | Actualizada ás 18:27
A Xunta de Galicia pon en marcha este luns, 18 de setembro, a campaña anual de traballos de campo dirixida a avaliar a calidade do transporte público interurbano autonómico, "campaña na que se potenciará a participación cidadá". As pescudas terán unha duración de sete semanas e incluirán enquisas aos usuarios, non usuarios e centros escolares con transporte integrado, xunto con observacións anónimas co modelo de cliente misterioso.
O obxectivo principal desta campaña, argumentan nun comunicado, é coñecer a valoración do transporte público por parte dos usuarios. Para iso, realizaranse 13.200 enquisas a bordo dos autobuses e tamén nas paradas. Estes cuestionarios permitirán coñecer o perfil dos usuarios do transporte público autonómico e a utilidade que lle brindan os servizos, e definir a súa satisfacción, segundo os criterios de calidade identificados. Ademais, a maiores das enquisas presenciais previstas, reforzaranse as canles de participación, de tal forma que a cidadanía poida deixar a súa valoración a través do portal www.bus.gal.
