O comisario de Emprego apela en Santiago a que haxa acordo da directiva de teletraballo e desconexión dixital en outubro

O comisario europeo de Emprego e Dereitos Sociais, Nicolas Schmit, apelou a que se poida alcanzar un acordo sobre unha nova directiva europea de teletraballo e desconexión dixital, que se esperaba "para onte ou para hoxe" pero aínda non se conseguiu. Así, manda o seu "alento" para que poida selarse nunha próxima reunión en outubro. "Espero que se logre", afirma.

En rolda de prensa conxunta en Santiago coa ministra de Traballo en funcións, Yolanda Díaz, con motivo dun cume europeo de emprego, Nicolas Schmit valora que a Comisión Europea "puxo o diálogo social no centro dos seus obxectivos". Así, razoa que as empresas "intelixentes" non poden "impor o seu desexo en contra da vontade dos seus empregados", polo que "o valor do diálogo social é enorme e debe impulsarse", "máxime neste proceso de transformación tecnolóxica".

O comisario remarca que se enfrontan a "moitos cambios", cunha revolución dixital e un cambio climático que provocan modificacións no mundo do traballo. Por tal motivo, Europa debe defender a súa forza económica e o seu modelo social en prol da "prosperidade". Lembra que o 80 % dos cidadáns europeos opinan que as actuais sociedades son "demasiado desiguais". Tras as crises, "os salarios non acompañan á produtividade", polo que para moitas persoas o traballo "xa non é suficiente", pois "non se paga o suficientemente ben". Por tal motivo, defende dar impulso ao diálogo social a través de diferentes convenios nun contexto de "enorme transformación".

Igualmente, referiuse a a revisión na que se está traballando da directiva existente de comités de empresa europeos, pois considera que a actual "non funciona como debería", "soamente abarca a consulta" e "moitas veces nin se practica a consulta". Por iso, coa colaboración do Parlamento Europeo, a Comisión decidiu mellorar esta directiva para "organizar mellor o mundo do traballo de mañá". Tamén tivo palabras para Santiago, "un lugar tan especial" e de "inspiración" para os europeos, que atraeu a persoas desde hai séculos porque "crían na paz" e en valores como "o diálogo".

ATENDER AOS "MEDOS" DOS TRABALLADORES Á TRANSFORMACIÓN

Non entanto, Nicolas Schmit advirte de que "moitos temen esa transformación". "Non debemos ignorar os seus medos", afirma, sobre os traballadores en relación cos seus postos de traballo e os seus salarios. "Temos que darlles confianza", agrega. Pide tomarse "moi en serio" eses temores, posto que "o medo nunca é bo conselleiro" e "nunca vai inspirar boas ideas". E é que alerta daqueles que "abusan e utilizan" o medo: "Aqueles que queren erosionar a nosa democracia".

Por tal motivo, defende unha "transición xusta", nun futuro "máis sustentable", o que significa que traballadores teñen que "aceptar algúns cambios" para adecuarse aos novos empregos. "Nunca deixalos abandonados", empraza. Precisamente, cre que a futura directiva de plataformas dixitais debe ser un "primeiro paso" para atallar os problemas dos algoritmos e a intelixencia artificial. Pide que haxa "xustiza" nesas plataformas grazas á directiva. A continuación, o comisario de Emprego expuxo que "non é aceptable que o algoritmo decida todo", dado que "non pode ser que a máquina acabe tendo todo o poder e que ás persoas non se as consulte" e "non pode ser que a democracia quede á marxe".

O comisario europeo de Emprego e Dereitos Sociais, Nicolas Schmit, á súa chegada a unha rolda de prensa no Hostal dos Reis Católicos, a 21 de setembro de 2023, en Santiago | Fonte: Álvaro Ballesteros