Pontevedra saca a licitación por 200.000 euros a iluminación de Nadal, Entroido e Peregrina para 2024
Lores aínda non pon data ao aceso do Nadal pero, tras a polémica do ano pasado, sinala que agora "o prezo da enerxía baixou", polo que todo debe estar preparado para os días 5-6 de decembro. O ano pasado o tardío aceso tivo lugar o 16 de decembro.
Por Europa Press / Redacción | SANTIAGO DE COMPOSTELA | 22/09/2023 | Actualizada ás 14:17
A xunta de goberno do Concello de Pontevedra sacou a contratación por un total de 200.000 euros a iluminación das festas, nun lote que inclúe o Nadal, o Entroido e a Semana Grande da Peregrina. Segundo informou o alcalde, Miguel Anxo Fernández Lores, o montante repartirase en 140.000 para a iluminación do Nadal, 20.000 para o Entroido e 40.000 nas festas do verán.
O prego de condicións sinala que a iluminación do Nadal ten que estar preparado para os días 5-6 de decembro, ao comezo da ponte festiva da Constitución, aínda que "non se tomou aínda unha decisión" en relación co día concreto do aceso. Cabe lembrar a polémica do pasado ano polo atraso no aceso da iluminación do Nadal da cidade. O Goberno local fixouna para o 16 de decembro nunha decisión que pretendeu ser unha mensaxe e un xesto enmarcado no aforro enerxético ante a crise climática mundial.
Con todo, fronte a aquela decisión, o Grupo Socialista, entón socio no goberno local, si que optou por iluminar desde o luns 5 de decembro o Mercado de Abastos. Como reacción á postura do Concello, o ano pasado os comerciantes e hostaleiros recolleron firmas para mostrar o seu malestar e xurdiu o movemento #IluminaPontevedra para buscar a colaboración cidadá para que "entre todos e sen axuda de estamentos públicos de ningunha cor", poida "brillar tamén en Nadal". Agora, Lores sinalou que "este é un mandato diferente" e "o prezo da enerxía tamén baixou respecto dese ano".
