Rueda non teme á candidatura de DO: "En Ourense nas autonómicas, sempre temos magníficos resultados"
O presidente da Xunta dixo non ter "nada que dicir" sobre a decisión de Democracia Ourensana de concorrer aos comicios autonómicos, cuxa celebración está prevista en 2024, á espera de que se convoquen.
Por Europa Press / Redacción | SANTIAGO DE COMPOSTELA | 11/10/2023 | Actualizada ás 18:17
O presidente da Xunta e do PPdeG, Alfonso Rueda, non quixo entrar a valorar o anuncio do alcalde de Ourense, Gonzalo Pérez Jácome, de que o seu partido, Democracia Ourensana, concorrerá ás eleccións autonómicas, pois "cada un pode tomar as decisións que quere".
No entanto, cuestionado sobre se teme que esa formación reste apoios aos populares na provincia, Rueda respondeu: "En Ourense nas autonómicas, sempre temos magníficos resultados". "Desde logo, tentarei que siga sendo así", agrega.
A preguntas da prensa tras o Consello da Xunta, Rueda dixo non ter "nada que dicir" sobre a decisión de Democracia Ourensana de concorrer aos comicios autonómicos, cuxa celebración está prevista en 2024, á espera de que se convoquen.
"Creo que o intelixente non é preocuparse do que lle ocorre aos demais, tentar facer eu o mellor posible e tentar ter o mellor resultado", asegura. "Isto é o que preocupa e me ocupa en Ourense".
Con todo, aclara que esta decisión non vai cambiar " en ningún caso" a súa relación institucional como presidente da Xunta co alcalde de Ourense. "Eu creo que estas cousas deben ser diferenciadas", deixa claro.
RELACIÓN DE DO E PP
As últimas eleccións autonómicas celebráronse en xullo do 2020, cando Democracia Ourensana gobernaba no concello de Ourense co Partido Popular, tras a firma dun pacto despois das eleccións do 2019 (un pacto que permitía a José Manuel Baltar manter o goberno da Deputación).
Nese pacto establecíase que Democracia Ourensana non concorrería ás eleccións autonómicas, algo que a formación realizara con anterioridade desde o ano 2005.
Ese pacto rompeu pouco tempo despois, tras a crise interna no grupo de goberno de DO, que culminou co abandono do PP e cun goberno local de só tres concelleiros. En outubro de 2021, Democracia Ourensana sinalaba que non concorrera ás autonómicas por ese pacto co PP, pero o acordo fora "dinamitado". Agora, Jácome confirmou que o seu partido volve á carreira electoral cara ao Parlamento de Galicia.
