Só un de cada tres traballadores galegos está altamente cualificado

Só un 33,1 % dos traballadores en Galicia están altamente cualificados, unha taxa inferior ao 33,9 % da media española e lonxe da europea, xa que supón 11 puntos menos que o 44,2 % da UE.

Así figura no estudo publicado por Eurostat da clasificación de rexións europeas en función do emprego altamente cualificado. Entre as comunidades españolas, tan só Madrid (46,5 %) está por encima da media europea e País Vasco aproxímase (42,2 %). Galicia ocupa o oitavo lugar entre autonomías (na clasificación europea sitúase no segundo chanzo pola cola dos seis existentes). Murcia anótase o peor dato (28,1 %).

En 2022, había uns 80 millóns de persoas altamente cualificadas empregadas en toda a UE, o que representa o 44,2 % do total de traballadores entre os 25 e os 64 anos. Así, 106 das 241 rexións europeas tiñan unha taxa igual ou superior á media da UE. As porcentaxes rexionais máis elevadas deste tipo de emprego rexístranse en: Estocolmo (Suecia, 73,6 %), Utrecht (Países Baixos, 68,9 %), Luxemburgo (67,4 %) e Brabant Wallon (Bélxica, 65,8 %).

As rexións rurais, os antigos núcleos industriais, así como as rexións ultraperiféricas e periféricas están entre as rexións da UE con menor proporción de persoas altamente cualificadas. Supoñen menos do 29,5 % en 24 rexións, concentradas no extremo sudoriental de Europa: 10 rexións en Grecia, seis en Romanía e catro en Bulgaria. Tamén inclúe a tres autonomías en España (Murcia, Castela-A Mancha e Estremadura), así como Panonska Hrvatska (Croacia).

As porcentaxes máis baixas de ocupados altamente cualificados rexistráronse nas rexións gregas de Sterea Elláda (21,8 %) e Ionia Nisia (22,3 %), así como na rexión romanesa de Sud-Muntenia (22,8 %).