Por Europa Press / Redacción | SANTIAGO DE COMPOSTELA | 19/10/2023 | Actualizada ás 15:38
Os orzamentos da Xunta para 2024, que esta semana foron aprobados polo Goberno galego antes de iniciar a súa tramitación parlamentaria, consignarán unha partida de máis de 250 millóns de euros para construír e mellorar infraestruturas e equipamento na rede de hospitais públicos. Para centros de Atención Primaria, resérvanse outros 61 millóns de euros. Así o destacou a xerente do Servizo Galego de Saúde (Sergas), Estrella López-Pardo, ao responder a unha pregunta da deputada do BNG Iria Carreira na Comisión 5ª, de Sanidade, Política Social e Emprego, do Parlamento de Galicia.
A nacionalista mostrou na súa intervención varias noticias sobre deficiencias en infraestruturas sanitarias, con exemplos concretos como o caso de tres teitos derrubados no Hospital Gil Casares e o de Conxo, en Santiago de Compostela. Todo iso ademais dos "recortes" e o "desvío de fondos" ao sector privado que, criticou, acomete a Xunta. Na súa resposta, a xerente do Sergas ofreceu detalles sobre os orzamentos autonómicos para o próximo ano, que en total destinarán máis de 400 millóns en investimentos no Sergas, unha barreira que se supera "por segunda vez", tras a deste 2023.
Entre elas, están as obras xa en marcha nos hospitais das cidades da Coruña, Ourense, Pontevedra, Ferrol e Santiago de Compostela. De feito, esta lexislatura iniciouse, destacou López-Pardo, "duplicando o capítulo de investimentos" da Consellería de Sanidade, ao pasar de 175 millóns a 350 entre os anos 2020 e 2021. En infraestruturas de Atención Primaria, reivindicou que desde 2009 (cando o PP volveu gobernar a Xunta) reformáronse un total de 115 centros de saúde e investíronse máis de 132 millóns neste campo.
Para 2024, nas infraestruturas e equipamento no primeiro nivel asistencial haberá 61 millóns de euros e continuarase nas actuacións actualmente en marcha en Lalín, O Porriño, Moaña e o centro integral de saúde (CIS) Olimpia Valencia de Vigo. Así mesmo, a xerente do Sergas refugou as críticas da deputada do BNG e reduciu as deficiencias mencionadas a cuestións "puntuais" que se solucionan de forma "urxente".
INFRAESTRUTURAS EN SANTIAGO
No caso concreto de Santiago, López-Pardo tamén anunciou que a Xunta licitará antes de que conclúa o 2023 a reforma do centro de saúde do barrio de Conxo. Para esta actuación, que implicará en total un investimento de máis de 5 millóns, os orzamentos de 2024 reservarán unha primeira partida de 3,5 millóns.
As obras permitirán adaptar esta infraestrutura "ás necesidades do século XXI". En concreto, actuarase nas unidades de saúde mental, que pasará a contar con cinco consultas médicas, tres de Psicoloxía, dúas de Enfermaría e unha sala de técnicas; á vez que se creará unha área de Psicoxeriatría con catro consultas. A maiores, incorporaranse ao centro de saúde unha consulta de Medicina de Familia, outra de Enfermaría, unha de Farmacia e unha sala de cirurxías menores.
En canto aos hospitais composteláns, o proxecto de orzamentos para 2024 consigna 16,6 millóns para financiar a anualidade da ampliación do Hospital Clínico (15,2 millóns) e dotar dunha nova resonancia magnética ao de Conxo (1,3 millóns). Todas as actuacións na capital galega avanzounas ao responder a unha pregunta da deputada do PP Carmen Pomar, quen aproveitou para dar o "parabén" á Administración galega polo seu traballo ao "mellorar a atención sanitaria dos galegos", en xeral, e dos composteláns, en particular.
CONTRATACIÓNS
Por outra banda, a xerente defendeu a legalidade das contratacións realizadas polo servizo sanitario despois de que a deputada do BNG Montse Prado esrgrimiese o informe de Conta Xeral do Sergas do Consello de Contas correspondente ao ano 2022. Segundo este documento, o Sergas concentrou o ano pasado o 90 % das adxudicacións directas 'a dedo' de toda a Administración autonómica e dedicou a iso ata 889 millóns de euros, 233 millóns máis con respecto ao ano 2021.
A xerente lembrou á deputada nacionalista que "xa interpelou nestes termos" ao conselleiro de Sanidade, Julio García Comesaña, nun pleno do Parlamento o pasado mes de abril, polo que, na mesma liña, defendeu a legalidade deste modelo de contratación que, ademais, está marcado polas "particularidades" da sanidade. Así, achacou o alto volume destas adxudicacións a que hai produtos farmacéuticos que "só os fornece un único provedor". Non en balde, Estrella López-Pardo afirmou que "case o 30 por cento" destes contratos non chegan a 500 euros e que "o 50 por cento" non alcanzan os 1.000.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.