Galicia plantará árbores autóctonas en 500 quilómetros de estradas para "previr lumes e reducir emisións"
Tamén creará unha oficina de asesoramento contra o cambio climático durante cinco anos.
Por Europa Press / Redacción | SANTIAGO DE COMPOSTELA | 26/10/2023 | Actualizada ás 20:35
O presidente da Xunta, Alfonso Rueda, avanzou dúas medidas vinculadas co clima e a ecoloxía que o seu goberno abordou este xoves no Consello. Por unha banda, activarase un servizo "pioneiro" para asesorar a entidades públicas e privadas sobre medidas ou proxectos para adaptarse para os efectos do cambio climático e, por outro, impulsarase o proxecto de "estradas verdes", para reforestar as marxes das vías de alta capacidade galegas con especies autóctonas, tras a experiencia piloto da autovía de Cangas do Morrazo.
Así, na súa comparecencia ante os medios posterior ao Consello, Rueda deu a coñecer o investimento de 25 millóns de euros na próxima década e que estará destinada á Estratexia de estradas verdes nos preto de 500 quilómetros de vías de alta capacidade autonómicas, tras a experiencia piloto da autovía do Morrazo.
"Vanse a reforestar marxes das estradas autonómicas con especies frondosas autóctonas", explicou Rueda, quen indicou que esta medida, que xa avanzou no debate sobre o estado da autonomía, ten como obxectivos "incidir na prevención dos lumes, gañar en eficiencia na conservación nas marxes das estradas autonómicas e contribuír a reducir as emisións" para avanzar cara á neutralidade en carbono nas estradas.
"Trátase de converter 500 quilómetros da rede viaria autonómica en corredores verdes", salientou Rueda, quen explicou que a primeira parte será, de feito, eliminar especies pirófilas como acacias, eucaliptos ou a herba da Pampa. Logo implantarase unha cuberta vexetal para impedir rebrotes e, unha vez realizadas todas as intervencións, plantaranse especies frondosas autóctonas.
OFICINAS DO CAMBIO CLIMÁTICO
Tamén anunciou o acordo para pór en marcha a oficina de asesoramento contra o cambio climático a principios de 2024, coa que se consolidará a posición da comunidade como rexión "líder e referente" na loita contra o quecemento global.
O obxectivo da Xunta é que Galicia alcance a neutralidade climática entendida como o equilibrio entre as emisións e as absorcións de gases de efecto invernadoiro derivadas da actividade humana. De feito, así o recolleu a Estratexia galega de cambio climático e enerxía 2050 (EGCCE 2050), en liña co establecido no Acordo de París, aprobado no marco do Cume do clima de Nacións Unidas de 2015.
