O delegado do Goberno valora a "gran acollida" do programa Ineco RuralTic para acabar coa "fenda dixital"
En Galicia son 17 municipios, de menos de 10.000 habitantes, os beneficiados
Por E.P. | OURENSE | 12/11/2023 | Actualizada ás 16:48
O delegado do Goberno en Galicia, Pedro Blanco, valorou a "gran acollida" da segunda convocatoria do programa Ineco Rural TIC do Ministerio de Transportes, Mobilidade e Axenda Urbana, ademais da "mellora que suporá para a alfabetización dixital dos galegos e galegas do rural". Así o expuxo no concello de Amoeiro (Ourense), acompañado do alcalde da localidade, Jose Luís González.
En Galicia son 17 municipios, de menos de 10.000 habitantes, os beneficiados nesta segunda convocatoria do programa Ineco Rural TIC. Dos cales, cinco son da Coruña, seis de Ourense, catro de Lugo e dous de Pontevedra.
Ademais dos habitantes e da administración pública, poderán beneficiarse tamén as pequenas e medianas empresas "a través do asesoramento en novas tecnoloxías que lles proporcionarán os axentes que se despracen ao municipio", como indicou Pedro Blanco.
A iniciativa partirá de dous eixos: a dixitalización social e a dixitalización económica. O programa impartirá formación sobre novas tecnoloxías aos veciños, atendendo especialmente aos de maior idade. Tamén ofrecerá información personalizada ao que o necesite e apoiará a creación de servizos en liña como páxinas web.
INVESTIMENTOS EN AMOEIRO
Doutra banda, o delegado do Goberno puxo en valor o investimento do Goberno de España no Concello de Amoeiro. A través do programa UNICO-BANDA Ancha pretenden facilitar a rápida conexión a internet no municipio. Entre as convocatorias do Plan UNICO, o Goberno investiu na provincia de Ourense 23.6000.000 euros, máis de 18.000 en Amoeiro.
O consistorio municipal de Amoeiro tamén recibiu máis de 220.000 euros do Instituto para a Diversificación e Aforro da Enerxía (IDEA), co fin de renovar e depurar as augas residuais, mellorar a iluminación e a eficiencia enerxética, entre outros.
