As novas condicións do selo Tenreira Galega poñen en apuros aos gandeiros: "Poden ocasionar gastos de ata 5.000 euros"

A secretaria xeral do Sindicato Labrego Galego-Comisións Labregas, Isabel Vilalba, cualificou este luns en Lugo como "moi negativa" e "contraproducente" a proposta para a modificación do prego de condicións do selo Tenreira Galega Suprema. O principal cambio introducido na regulación da Indicación Xeográfica Protexida (IXP) é a obrigatoriedade de "estabular e protexer das inclemencias meteorolóxicas" aos tenreiros, unha medida que, denuncian desde o sindicato, afectará á "calidade do alimento", ao "benestar dos animais" e á "sustentabilidade económica das granxas".

"O que nós pedimos é que non se faga obrigatorio meter aos animais en recintos pechados e cebalos con concentrados. Parécenos contraproducente e dubidamos que Europa acepte este cambio porque se está pondo uns obxectivos de incremento da superficie en ecolóxico", manifestou, respecto da modificación do texto aprobado no último pleno da IXP, Isabel Vilalba.

O Sindicato Labrego Galego, que trasladou a súa "preocupación" polo cambio normativo á Consellería do Medio Rural, denunciou tamén que non exista ningún estudo "da repercusión económica" que o cambio pode ter para os gandeiros e gandeiras que crian aos animais en liberdade en granxas familiares. "Moitas granxas que cumpren os índices ao máximo nivel marcados polo consello regulador non teñen as instalacións para estabular e iso implica meter na obrigatoriedade de ter esas instalacións a granxas que hoxe producen en extensivo", explicou o sindicato.

A modificación, que non responde a "unha postura unánime do sector" e que vai en contra, denuncian, "das recomendacións da Unión Europea sobre agricultura ecolóxica", podería "deixar fóra da marca a moitas granxas galegas", ademais de ocasionar un incremento no gasto de produción dos gandeiros de "entre 4.000 e 5.000 euros".

"Ninguén dubida de que a produción en ecolóxico é unha produción de calidade, que é o que reclama a sociedade, e a calidade do alimento é maior cando o animal se alimenta con leite materno e directamente no pasto. Non nos vale que saquen liñas de financiamento porque moita xente queda fóra desas axudas", finalizou Vilalba, quen cualificou o cambio normativo aprobado como un intento por "homoxeneizar a Tenreira Galega Suprema coa carne de cebadeiro".

O Sindicato Labrego Galego-Comisións Labregas, durante a rolda de prensa convocada este luns 20 de novembro en Lugo para denunciar a industrialización da IXP Tenreira Galega Suprema | Fonte: Europa Press