O Parlamento pide que se aborde a situación actual do transporte público e escolar do Barbanza

A Comisión 2ª Ordenación Territorial, Obras Públicas, Medio Ambiente e Servizos aprobou por unanimidade unha proposición non de lei para que a Xunta aborde a situación actual do servizo de transporte público e escolar na comarca de Barbanza. O grupo do BNG, que propuxo a iniciativa e aceptou unha emenda de substitución do PPdeG, denunciou que levan anos traendo ao Parlamento iniciativas como esta e que, nos últimos dous anos, "non só non houbo avances, senón que houbo retrocesos".

De feito, apuntou, a cidadanía de Barbanza está "tan molesta" que se organizou e puxo en marcha unha plataforma para reclamar un transporte digno para a comarca. Esta plataforma, indicou, xa se dirixiu por escrito á Consellería e, "de momento, a día de hoxe, sen resposta". Esta vez, sinalaron, agregan un aspecto novo, os incumprimentos da empresa concesionaria do transporte público en Barbanza, que supoñen unha "falta de respecto" polos usuarios e polas súas demandas.

A este respecto, relatou as numerosas impuntualidades e atrasos, e que mesmo os autobuses "non pasen nin paren cando en teoría teñen que facelo".

"E que fai a empresa para tentar pechar algunhas bocas que protestan? Pois en determinadas horas, en horas punta, pon a maiores do autobús previsto un minibus, que evidentemente non chega para todo o alumnado que ten que recoller de distintos centros da comarca", apuntaron. Así mesmo, indican que o estado dos autobuses é "absolutamente calamitoso" e que, en temas de accesibilidade, estase "absolutamente a cero, incumprindo unha e outra vez as existencias normativas".

Por último, alertaron da falta de comunicación entre os centros dos municipios, os centros urbanos, as parroquias... "Este goberno do Partido Popular era o que ía mirar polo rural, polas aldeas e polos sitios que non son centros urbanos, pero estamos peor que hai 14 anos respecto diso", censuraron.

Transporte escolar | Fonte: FEDRINTRA.