Un río atmosférico trae, desde o Caribe, intensas choivas a Galicia durante esta ponte
A Península Ibérica quedará no camiño do chorro polar, a chamada cinta transportadora de borrascas, e dun río atmosférico de humidade. Fará frío pero subirán moito as temperaturas e a chuvia pode superar os 200 l/m2 no sur de Galicia.
Por Galicia Confidencial | Compostela | 04/12/2023 | Actualizada ás 20:08
O mes de decembro chegou con temperaturas propias do inverno pola presenza do aire polar, deixando nevadas en zonas do norte e xeadas nas cordilleiras montañosas. Debido ao paso do chorro polar sobre a Península e a chegada dun río atmosférico, nos próximos días espéranse frontes activas que deixarán precipitacións copiosas. Así o explica Samuel Biener, experto de Meteored, na previsión da esperada ponte de decembro.
Este luns, a fronte que deixou precipitacións en gran parte de España, dirixirase cara ao leste da península, pero chegará bastante debilitado ao Mediterráneo. O martes, a maioría das precipitacións daranse no Cantábrico oriental e Pireneos, aínda que tamén se esperan chuvieiros localmente intensos en Cataluña e Baleares. En canto ás temperaturas prevese unha baixada, deixando xeadas intensas en zonas do Pirineo e mínimas de -3 ºC en capitais como Burgos e Teruel.
O mércores será un día de transición porque a última hora do día chegará unha nova fronte polo noroeste que deixará choivas localmente intensas en Galicia e zonas do Cantábrico. As temperaturas máximas subirán de forma xeneralizada en case todo o territorio, aínda que as mínimas baixarán na zona norte, chegando aos -4 ºC en Palencia e León.
RÍO ATMOSFÉRICO
A nova fronte ven acompañada dun río atmosférico, unha franxa longa, estreita e transitoria na troposfera onde se produce un transporte horizontal de vapor de auga, fornecido por fontes de humidade tropicais e extratropicales. Os ríos atmosféricos poden provocar precipitacións intensas e xeneralizadas onde son forzados a ascender, por exemplo en cordilleiras ben expostas a eses fluxos de humidade.
Durante o xoves e o venres, as precipitacións reforzaranse en gran parte do país. A Península quedará baixo o chorro polar, a cinta transportadora de frontes e borrascas, e á vez recibirá un río atmosférico que conectará á península practicamente co Caribe. Este escenario meteorolóxico derivará en choivas xeneralizadas, que serán localmente intensas e persistentes en Galicia.
CHOIVAS MOI FORTES
Debido á chegada deste fluxo de aire subtropical, moi húmido e tépedo, e á nebulosidade as temperaturas mínimas ascenderán de forma notable, tamén o farán as máximas. Durante o fin de semana espérase que sigan chegando novas frontes, con rexistros máis destacables en Galicia.
As choivas serán moi significativas no suroeste de Galicia, con acumulados que pasarán dos 200 l/m². As nevadas serán destacables nas zonas máis altas de Galicia, especialmente, na cordilleira pirenaica, con espesores que excederán os 50 cm no sector axial.
