Trocar horas de estudo por cartos? Coa Olimpíada Solidaria da USC é posible mandar diñeiro para tratar a saúde mental no Congo
O estudiantado que desenvolva o seu tempo de estudo nas bibliotecas da Universidade, tanto no campus de Santiago como no de Lugo, pode rexistrar as horas que invista a través dun código QR que estará á beira do cartel da Olimpíada na entrada da biblioteca. Por cada hora de estudo rexistrada, a persoa usuaria doará 1 euro ás entidades patrocinadoras.
Por Europa Press / Redacción | SANTIAGO DE COMPOSTELA | 14/02/2024 | Actualizada ás 17:13
A vixésima edición da Olimpíada Solidaria de Estudo da USC arrincará este xoves e estenderase ata o 15 de marzo, permitindo aos universitarios trocar as horas de estudo por euros que serán investidos na formación de profesionais en saúde mental para o restablecemento psicolóxico das mulleres, menores e sobreviventes, vítimas dos conflitos bélicos da provincia de Kivu Sur, na República Democrática do Congo.
O estudiantado que desenvolva o seu tempo de estudo nas bibliotecas da Universidade, tanto no campus de Santiago como no de Lugo, pode rexistrar as horas que invista a través dun código QR que estará á beira do cartel da Olimpíada na entrada da biblioteca. Por cada hora de estudo rexistrada, a persoa usuaria doará 1 euro ás entidades patrocinadoras.
No Campus de Santiago participan as bibliotecas Concepción Arenal, Bioloxía, Ciencias da Comunicación, Ciencias Económicas e Empresariais, Enfermaría, Escola Técnica Superior de Enxeñaría, Filoloxía, Filosofía, Física, Matemáticas, Medicamento e Odontoloxía, Psicoloxía e Ciencias da Educación, Química, Xeografía e Historia e Biblioteca Xeral. No caso do campus de Lugo, as bibliotecas participantes son os Intercentros e a de Formación do Profesorado. En concreto, con esta iniciativa formaranse oito doutores, oito enfermeiros, oito psicólogos e oito asistentes sociais en "técnicas modernas no tratamento do trauma", para atender unha poboación de 2.520 persoas, das cales unha alta porcentaxe son mulleres, nenas e nenos.
Coopera Congo (COCO) a través do seu Centro Psicosocial Mutima África, especializado en tratamento de traumas severos, porá en marcha outras tres clínicas de atención psicosocial para centos de vítimas dos conflitos bélicos na rexión de Kivu Sur. Haberá un punto permanente de atención no propio Centro Psicosocial de Mutima África onde se atenden, desde hai varios anos, vítimas de violencia de xénero, violencia sexual e diferentes traumas causados polos grupos rebeldes establecidos no Parque Nacional de Kahuzi-Biega.
O persoal médico recibirá unha formación extra en diagnóstico e farmacoloxía psicotrópica. Calcúlase que será atendida unha poboación de 2.520 persoas, fundamentalmente mulleres e nenos, en terapia individual, mentres que o asistente social realizará sensibilización da comunidade, a través de conferencias en radio e reunións comunais cos líderes das zonas.
