18F.- A participación dos galegos emigrados sobe ao 6,15 % do total, case seis veces máis que no 2020

Un total de 29.300 galegos residentes no estranxeiro votaron nestas eleccións autonómicas de 2024, o que supón un 6,15 % dos 476.514 que forman parte do Censo Electoral dos Residentes Ausentes (CERA). Así o confirmou o director xeral de Emerxencias, Santiago Villanueva, en rolda de prensa este domingo no Centro de Datos da Xunta instalado en San Caetano.

Os resultados deste voto, que por primeira vez despois de tres comicios autonómicos non foi 'rogado', daranse a coñecer o 26 de febreiro. No 2020 votaran 5.404 persoas (1,17 %); en 2016, 10.777 (2,41 %); e en 2012, 12.954 (3,26 %). Mentres, en 2009 depositaran o seu voto no estranxeiro 101.708 electores, un 30,2 % do total.

Polo momento descoñécese o voto do estranxeiro debullado por provincias. En todo caso, a circunscrición da Coruña é a que rexistra un maior número de electores CERA, con 164.8421; seguida de Pontevedra, con 138.182; Ourense, con 103.832; e Lugo, con 69.658. En canto ao 'top cinco' de países, segundo o número de potenciais electores que residen no estranxeiro, Arxentina segue á cabeza con moita diferenza, xa que computa 166.289. Séguenlle Cuba e Brasil, onde se superan os 45.000. Mentres, Uruguai computa 37.165; e Suíza, o primeiro país alleo ao continente americano no ranking, 34.114.

O CERA reflicte así o peso porcentual que teñen os residentes no exterior á hora de decidir sobre o futuro Goberno autonómico, un feito que avala unha ollada ao histórico de eleccións celebradas na Comunidade. Non en balde, cando Manuel Fraga perdeu en 2005 a maioría absoluta, fío á emigración a posibilidade de subir ata o escano 38.

O foco estivo entón na provincia de Pontevedra, pero o reconto do voto exterior certificou o fin da era de Fraga á fronte da Xunta. Catro anos máis tarde, en marzo de 2009, o seu sucesor, Alberto Núñez Feijóo, logrou sumar 39 dos 75 escanos da Cámara autonómica na noite electoral. Posteriormente, o voto emigrante rebaixaría a súa maioría absoluta a 38 actas, ao gañar o PSOE uno por Ourense en detrimento do PPdeG.

Ao agora líder nacional do PP, en cambio, nas autonómicas de xullo de 2020, as últimas ás que se presentou en Galicia, o apoio dos emigrantes permitiulle o seu máis ampla maioría absoluta ao chegar ás 42 actas no hemiciclo galego (o reconto do sufraxio na diáspora inclinou esta vez a balanza ao seu favor ao arrebatar un escano ao PSdeG en Pontevedra, que sumou o PPdeG).

Papeletas electorais, no Centro Galego de Arte Contemporánea (CGAC), a 18 de febreiro de 2024, en Santiago de Compostela | Fonte: César Arxina