O Concello de Ourense recoñece "deficiencias" económicas no servizo de conciliación

O pleno ordinario do mes de marzo no concello de Ourense serviu para que o goberno municipal garanta a continuidade das actividades dos centros cívicos ata verán, aínda que recoñecendo "deficiencias" económicas no servizo de conciliación.

O Partido Socialista presentou unha moción sobre a continuidade dos programas de conciliación laboral, "non só para que se manteña o que xa funciona, senón para que aumente o número de prazas e actividades ofertadas" e que "non se realicen só en período lectivo, senón tamén en épocas de vacacións", segundo explicou a secretaria Xeral da formación en Ourense, Natalia González. González tamén criticou "o caos" e o "descontrol" na área de Servizos Sociais.

Pola súa banda, a concelleira da carteira, Ana Fernández, recoñeceu "deficiencias" orzamentarias para dar cobertura ás actividades, pero asegurou que está "garantido o servizo ata finais de verán" e que desde este venres "dáse con total normalidade". Fernández escusou que "a partida económica neste programa de actividades infantís leva sendo insuficiente desde 2011", unha réplica que recibiu a resposta do Partido Socialista afeando que "nunca estivo en risco continuamente un programa de conciliación". "A pesar de que as partidas sexan insuficientes existe algo que é a capacidade de xestión, que vostedes non teñen", puntualizaron.

Neste sentido a oposición criticou a "falta de planificación", de "xestión" e duns orzamentos actualizados para dar correcta cobertura a estes programas. Nesta liña, a edil do Partido Popular Noelia Pérez afeou que o goberno municipal sexa "incapaz de planificar non só no tema de conciliación, senón tamén en actividades para adultos, entidades veciñais e outras cuestións", afirmando que "é unha tónica xeral".

Do mesmo xeito a edil do PSOE, Natalia González, aludiu á "falta de crédito", de "previsión" e de "vontade" por parte do goberno municipal neste tipo de programas.
Tamén a concelleira do BNG, Ruth Reza, sinalou que a Concellaría de Servizos Sociais "está sen recursos" e que algunhas entidades "están sen axudas", os comedores sociais "sen fondos" e "a partida de emerxencias sen recurso o económico necesario".

A moción saíu aprobada polos grupos da oposición: PP, PSOE, BNG e coa abstención do goberno municipal de Democracia Ourensana.

MOCIÓN PARA REXENERACIÓN URBANA DA ZONA VELLA

Así mesmo, no pleno tamén se debateu unha moción non resolutiva sobre a declaración da zona vella como área de rexeneración urbana, para revitalizar a zona. O PP, que propuxo a moción, insistiu en que a declaración "frearía" o "declive" económico e a "degradación da zona", mentres que o BNG e o Partido Socialista lamentaron "a ruinosa situación" da zona.
A moción aprobouse cos apoios dos grupos da oposición e coa abstención de Democracia Ourensana.

A maiores, o Grupo Municipal Socialista conseguiu o respaldo maioritario da oposición (PP e BNG) para aprobar a moción de termalismo na que reclamaban ao goberno local que abandone o "autoaillamento institucional" e traballe de forma colaborativa con outras administracións.

Pola súa banda, o BNG presentou unha moción relativa á defensa das medidas de apoio e fomento da lactación materna en Ourense. Pedían instar á Xunta e ao Concello a regularizar a Comisión de lactación da área sanitaria e a elaboración dun programa de saúde materno infantil. A moción tivo os votos a favor de PSOE e BNG e a abstención de PP e DO.

Arquivo - O alcalde de Ourense en funcións, Gonzalo Pérez Jácome, á súa chegada a unha sesión extraordinaria do Pleno do Concello de Ourense, a 14 de xuño de 2023, en Ourense, Galicia (España). Durante este pleno extraordinario aprobáronse as actas. Agostime - Europa Press - Arquivo