Por Europa Press / Redacción | SANTIAGO DE COMPOSTELA | 12/03/2024 | Actualizada ás 12:45
O Concello de Cambre celebrará este xoves, ás 11,00 horas, o pleno para dar conta da dimisión de Óscar García Patiño como alcalde, presentada a semana pasada por, segundo explicou ante os medios de comunicación, un bloqueo administrativo do que responsabilizou á interventora e a secretaria municipal.
Así o confirmaron fontes municipais consultadas por Europa Press que precisaron que será o único punto da orde do día. Posteriormente, deberá haber outra sesión plenaria para elixir alcalde ou alcaldesa e despois un de organización, no que se aproban as distintas áreas de responsabilidade.
Na súa comparecencia ante os medios de comunicación, o xa exalcalde , que primeiro comunicou a súa decisión ao seu partido, Unión por Cambre, do que tamén é presidente -- cargo que seguirá ostentando-- xa avanzou o proceso a seguir e que, mentres, quedaría como alcalde en funcións o primeiro tenente de alcalde Juan González.
García Patiño adoptou a decisión de dimitir tras os problemas no pago de facturas, con paralización do servizo de gasoil por parte da empresa subministradora e con incidencias, entre outras, coa que xestiona o servizo da auga tamén por falta de pagamentos, que o exalcalde atribuíu ás diferenzas existentes coa interventora e a secretaria municipal en canto a aspectos como a interpretación da lei.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.