O Sergas mercará un novo medicamento CAR-T para pacientes con linfomas

O Servizo Galego de Saúde (Sergas) destinará máis de 12 millóns de euros á subministración dun novo medicamento CAR-T para pacientes con linfomas. Este tipo de fármacos consiste en extraer linfocitos do propio doente, modificalas xeneticamente e, posteriormente, volverllos a administrar para atacar mellor ás células canceríxenas. En concreto, o Goberno galego, na súa reunión deste luns, autorizou a adquisición de 'Tecartus', un medicamento indicado para linfomas de células do manto que non responden a ningún tratamento ou que sofren unha recaída "tras probar dúas terapias convencionais".

O presidente da Xunta, Alfonso Rueda, explicou que, ata o momento, xa foron tratados con 'Tecartus' tres pacientes do Sergas. Coa compra autorizada este luns, prevese que poidan ser tratados 10 pacientes ao ano. Rueda enmarcou a adquisición deste CAR-T na "aposta decidida" da Xunta por "ir á vangarda na loita contra o cancro" e conseguir un "medicamento máis personalizado", algo que --reivindicou-- "só o País Vasco" fai dunha forma similar a Galicia.

Segundo datos que ofreceu o propio presidente, ata decembro de 2023 o Sergas investiu máis de 9,5 millóns de euros en fármacos CAR-T para tratar a un total de 60 pacientes. Cabe lembrar que Galicia conta xa co Centro de Fabricación de Terapias Avanzzadas, en Santiago, para a investigación, obtención e práctica clínica deste tipo de fármacos.

LIMPEZA DO MATERNO-INFANTIL DA CORUÑA

Tamén en clave sanitaria, o Consello da Xunta autorizou este luns a contratación, por 5,9 millóns de euros, do servizo de limpeza do Hospital Materno-Infantil Teresa Herrera da Coruña.

O orzamento de licitación é para dous anos e o contrato prevé melloras como aumentos retributivos para o persoal de limpeza e a redución de xornada da que se benefician todos os traballadores do Sergas.

O Consello da Xunta o 20 de maio de 2024 presidido por Alfonso Rueda.. XUNTA | Fonte: Europa Press