A oposición de Ferrol presenta unha moción conxunta para reclamar un cambio na actitude "soberbia" de Rey Varela

Os tres grupos municipais na oposición no Concello de Ferrol, PSOE, BNG e Ferrol en Común, presentaron unha moción conxunta ao pleno de fin de mes na que piden un cambio de actitude do goberno que preside o popular José Manuel Rey Varela, ao que acusaron de practicar a "soberbia" e o "autoritarismo".

Nunha rolda de prensa ofrecida no mediodía deste mércores, o portavoz do grupo socialista, Ángel Mato, asegurou que "o que está a pasar con este goberno municipal non ten precedentes en democracia" e que o alcalde "ten confundida a maioría absoluta co absolutismo". "Os grupos da oposición carecemos das ferramentas e instrumentos democráticos para poder facer o noso traballo, xa que fomos lexitimamente elixidos tal e como foi tamén o goberno", dixo.

Mato manifestou que o seu grupo "no ano 2023 presentou 55 solicitudes por rexistro para obter distintas documentacións" das cales, indicou, só foron respondidas "cinco"; e criticou a contratación de "once asesores municipais, dos que non deron conta nin dos méritos, capacidade nin de como se fixou esa selección". Por último, Mato detallou que desde o grupo socialista "este é o primeiro paso" para reclamar un cambio de actitude e, se non, será necesario "recorrer a outros espazos que xa non son municipais para poder realizar a tarefa como oposición".

SEN DIÁLOGO

Desde o BNG, a edil María del Mar López criticou "a falta de diálogo e debate deste goberno", pondo como exemplo o novo Regulamento de grandes cidades, mentres que nos plenos non poden "elevar os temas necesarios, que preocupan á cidadanía, podendo só presentar dúas mocións por cada grupo", mentres que, nas distintas comisións, segundo a representante do BNG, "non deixan preguntar, retiran a palabra e non pasan os expedientes que se solicitan". 

O portavoz de Ferrol en Común, Jorge Suárez, detallou que desde o seu punto de vista "a palabra que define a este goberno neste último ano é a soberbia e que confunde a maioría absoluta co autoritarismo". O tamén exrexedor asegurou que en mandatos anteriores "sempre se discutiron os asuntos de transcendencia, pola súa relevancia, sempre foron abordados en xunta de portavoces", pero que agora están a vivir "o desprezo tanto nos plenos como nas comisións, con actitudes totalmente desafortunadas". "Nós cremos que, se se quere construír cidades, non se poden apropiar como está a facer o Partido Popular", dixo Suárez.