O PSdeG afirma que a súa formación “escoita e respecta” todas as voces

A secretaria xeral do PPdeG, Paula Prado, asegurou que o PSOE está "a tentar resistir", pero, na súa opinión, "vai resistir tanto como lle deixen resistir os seus socios de investidura". "E aí está o BNG", apuntou.

Así o manifestou en declaracións aos medios na sede do PP de Santiago, onde acudiu a votar no proceso para elixir o candidato a presidir o PP Nacional, Alberto Núñez Feijóo, única candidatura. Alí, Paula Prado reivindicou que esta votación mostra "un xesto democrático" para decidir "libremente" quen vai ser o próximo presidente do PP nacional. Lembrou que Galicia contará no Congreso Nacional dos populares con 316 compromisarios e 11.665 inscritos, "un 23% de toda España".

Para Prado, Pedro Sánchez ten "secuestrada" a gobernabilidade de España a través de "a delincuencia que se instalou arredor del e do seu Goberno", polo que volveu a demandar que "abra as urnas do Goberno de España" para decidir, "en liberdade, o futuro de España e sacar a delincuencia do Goberno", ademais de "a corrupción do PSOE e a complicidade" coa que, ao seu xuízo, actúan os seus socios de goberno. Especialmente, dixo, o BNG, "que ten que dar moitas explicacións" porque "pasan de ser cómplices a ser algo máis". Neste sentido, reiterou a súa petición de eleccións e de "honestidade".

Xunto ao número 2 do PP galego, o presidente do PP local, Borja Verea, sinalou que é o momento de "a decencia, do sentido común e da gobernabilidade". Por estes motivos, afirmou que mostran o seu apoio a Feijóo, "non para que continúe como presidente do partido, senón como próximo presidente do Goberno". "Levo tempo dicindo que o PSOE e o BNG son o mesmo: necesítanse sempre. O mellor exemplo é Santiago de Compostela, o BNG tivo un ridículo resultado e goberna a nosa cidade co apoio do PSOE de Pedro Sánchez", lamentou.

RESPOSTAS DO PSdeG

Lara Méndez, responsable de organización do PSdeG, sostivo este luns nunha rolda de prensa que a súa formación "escoita e respecta" todas as voces, "independentemente do minoritarias que poidan ser". "O que temos claro desde o PSOE é que, cando hai algún indicio dunha conduta que se sae do que ten que ser a conduta dunha persoa que se dedica ao servizo público, actuamos", sostivo para sinalar que así se fixo tras ter coñecemento do informe da UCO.

A responsable de Organización do PSdeG incidiu en que, polo momento, o que se coñece é este documento e que o Partido Socialista "xa saíu inmediatamente pedindo a dimisión" de Santos Cerdán e "actuando contundentemente". Lara Méndez afirmou que o PP "non pode dicir iso" e lembrou que o Partido Popular "segue sen dar explicacións" sobre unha "presunta agresión sexual", en relación á denuncia que levou á dimisión do que era conselleiro do Mar, Alfonso Villares. "Por tanto, estamos a ver como se actúa de forma distinta", subliñou para trasladar que o PSOE pide "responsabilidade a todas e a cada unha daquelas persoas que non actúen como se debe actuar nun exercicio da función pública".

A dirixente socialista sostivo que "ningún partido está exento" de que nas súas filas poida haber "un caso de agresión sexual ou un caso de corrupción" pero insistiu en que a diferenza é que o PSOE actúa "de forma inmediata" e "sen contemplación".