Rueda destaca o sector inmobiliario como "fonte de emprego estable"
Por Europa Press / Redacción | VIGO | 27/03/2025 | Actualizada ás 21:28
O presidente da Xunta, Alfonso Rueda, reafirmou a aposta do Goberno galego por un urbanismo "sustentable e de calidade" ante os retos do sector inmobiliario, que é "fonte de emprego estable" e un "alicerce" da economía galega. Así o sinalou na súa participación na cerimonia de entrega dos XXIX Premios Aproin, entregados pola Asociación de Promotores Inmobiliarios de Pontevedra para recoñecer os proxectos e execucións mellor desenvolvidas ao longo do ano pasado.
O xefe do Executivo autonómico eloxiou a visión dos homenaxeados, asegurando que o sector inmobiliario é un "alicerce da economía galega, fonte de emprego estable, de riqueza transversal e de desenvolvemento urbano".
Neste sentido, agradeceu os pasos dados nos últimos anos por estes profesionais do urbanismo "cara a unha maior eficiencia, maior sustentabilidade e adaptado ás necesidades reais da sociedade". Fronte aos futuros desafíos aos que se enfronta o desenvolvemento urbano, Rueda destacou o compromiso da Xunta co sector para crear proxectos "que melloren a vida dos galegos", reiterando que a Xunta busca duplicar o parque público de vivenda con 4.000 novos inmobles, dos cales xa están en execución a metade.
