A campaña de doazóns para a defensa xurídica contra Altri supera os 10.000 euros en catro días

A Asociación para a Defensa Ecolóxica de Galiza (Adega) celebrou que a campaña de doazóns para a loita xudicial contra Altri e a Mina de Touro superou en catro días os 10.000 euros. Segundo trasladou a entidade, a campaña 'Xustiza para o Ulla' superou deste xeito o 25 % do obxectivo mínimo fixado, 39.100 euros nun prazo de tres meses. Ademais, o fondo común da campaña alcanzou xa os 1.000 euros.

Para Adega, esta "rápida e firme resposta cidadá" evidencia a "gran preocupación social" polo impacto ambiental e socioeconómico que, apuntou, "suporía a instalación da macrocelulosa de Altri en Palas de Rei". Ademais, a asociación ecoloxista considera que reflicte tamén "o compromiso da sociedade galega coa defensa dos ríos e do territorio fronte a proxectos industriais altamente contaminantes para o conxunto de Galicia". Por iso, mostrou o seu "profundo agradecemento" a todas as persoas que contribuíron ata o momento coa campaña e fixo un chamamento a seguir sumando apoios para levar o proxecto de Altri e Greenalia aos tribunais.

O obxectivo é que estes fondos permitan a Adega enfrontar "con garantías económicas, técnicas e xurídicas" dous recursos contencioso-administrativos no Tribunal Superior de Xustiza de Galicia (TSXG): a impugnación da Autorización Ambiental Integrada (AAI) do proxecto de Altri anunciada para antes do verán e o recurso contra a denegación da solicitude de arquivo do trámite da concesión de augas "por exceder o prazo máximo para a súa resolución sen que esta se producise".

Así mesmo, Adega avanzou que continuará lanzando novos obxectivos económicos conforme se vaian dando ou anunciando as distintas resolucións administrativas recurribles da Xunta que sexan favorables á execución de Altri ou á mina de Touro-O Pino. As doazóns poden realizarse a través da páxina web da campaña: https://adega.helpbysc.com/xustizaulla. Todas as contribucións contarán con beneficios fiscais de ata o 80 % na declaración do IRPF.

ANA MIRANDA CRITICA QUE EURODEPUTADOS DO PP PIDAN FONDOS PARA ALTRI

Pola súa banda, a eurodeputada do BNG, Ana Miranda, criticou que os eurodeputados do PP pidan que a multinacional lusa Altri pidan fondos europeos para o proxecto que quere instalar no municipio lucense de Palas de Rei. "Que intereses ten o PP para querer que en Galicia se instale unha macrocelulosa que vai destruír o medioambiente dunha comarca como A Ulloa e miles de empregos xa existentes?", manifestou. Nunha nota de prensa, a eurodeputada do Bloque reiterou a negativa dos nacionalistas a que unha empresa "altamente contaminante" reciba fondos europeos que, na súa opinión, deberían de servir para "a protección da terra e o saneamento das rías, non para destruílas".

Para Miranda, o proxecto que Altri quere instalar en Palas de Rei provocará "contaminación das augas do río Ulla e do encoro de Portodemouros, contaminación ambiental, destrución de hábitats singulares e perda de biodiversidade polo impulso dunha maior eucaliptización de Galicia", ademais de pór en risco tres especies de flora en perigo de extinción. Do mesmo xeito, cuestionou "por que o PP empéñase en enganar á cidadanía e vender como positivo un proxecto altamente destrutivo para Galicia" e pregunta "que intereses ocultan".