Un mozo de Asturias detido tras contactar por Internet cun menor pontevedrés con fins sexuais
O detido pedía ás menores fotografías e vídeos de contido erótico sexual, producidos por eles mesmos e, unha vez recibidos os arquivos de vídeo e fotográficos, compartía co menor outros arquivos con alto grao de contido sexual explícito
Por E.P. | SANTIAGO DE COMPOSTELA | 04/04/2025 | Actualizada ás 12:32
A Garda Civil detivo a un mozo, de 20 anos e veciño de Xixón, como presunto autor dun delito contra a liberdade sexual ao contactar cun menor, de 13 anos, de Pontevedra con fins sexuais.
Segundo informou o Instituto Armado nun comunicado, a operación 'Fariseo', realizada polo Equipo de Investigación Tecnolóxica da Unidade Orgánica da Policía Xudicial da Comandancia da Garda Civil de Pontevedra (EDITE), comezou en febreiro do pasado ano tras a denuncia presentada polos pais do menor.
O detido pedía aos menores fotografías e vídeos de contido erótico sexual, producidos por eles mesmos e, unha vez recibidos os arquivos de vídeo e fotográficos, compartía co menor outros arquivos con alto grao de contido sexual explícito.
Con iso, indicou a Garda Civil, conseguía gañar aos poucos a confianza das súas vítimas para, máis tarde, involucralos nunha actividade sexual, tentando concertar coas vítimas un encontro real co obxectivo de manter relacións sexuais.
As actuacións foron coordinadas co Xulgado de Instrución número 1 e a Fiscalía de Pontevedra. O detido quedou en liberdade, coa obrigación de presentarse ante a autoridade xudicial cando sexa requirido.
