O Parlamento galego demanda igualdade para o pobo xitano cando se cumpren 600 anos da súa presenza na Península

O Parlamento de Galicia reivindicou este martes, en favor da igualdade do pobo xitano, "investimentos e políticas máis ambiciosas e sostidas" que permitan a este colectivo "acceder a un emprego digno, combater o fracaso escolar e a segregación ou erradicar o chabolismo". "Son imprescindibles tamén respostas institucionais e xurídicas firmes ante os casos de discriminación e o discurso de odio", agrega.

Así o transmite a declaración institucional que leu o xefe do Lexislativo, Miguel Santalices, ao termo do debate e motación das mocións, na que se lembra que se cumpren 600 anos da presenza do pobo xitano na Península Ibérica, feito inscrito nun documento que fai constar que o 12 de xaneiro de 1425 Alfonso V, rei de Aragón, outorgou a Juan, Conde de Exipto Menor, un salvoconduto que o autorizaba a viaxar libremente na súa peregrinación a Santiago.

Desde entón, continúa o texto parlamentario, o pobo xitano está presente na Península Ibérica, "achegando a súa rica expresión artística, o seu léxico, a súa gastronomía, os seus oficios...". "É imposible imaxinar a cultura española sen que o compoñente xitano forme parte dela. Tamén resulta imposible desligar a historia de Galicia da contribución e a pegada do pobo xitano", agrega.

A pesar de que pasaron seis séculos e o pobo xitano forma parte esencial do crisol cultural que conforma a sociedade española, a declaración fai constar que "o profundo descoñecemento do pobo xitano, da súa diversidade, da súa identidade, da historia e da cultura que comparten, está na base do rexeitamento e a discriminación antixitana". Engade que o coñecemento do pobo xitano segue "baseado en xeneralizacións, prexuízos ou estereotipos negativos".

Coa aprobación da Constitución e a instauración da democracia, continúa o texto que leu Santalices, "o pobo xitano foi alcanzando cotas de igualdade e mellorando as súas condicións de vida". Pero subliña que aínda quedan "retos pendentes", dado que "os xitanos e as xitanas son máis pobres, teñen un nivel educativo moi inferior á media que condiciona o seu futuro, levan o peso dunha imaxe social negativa e sofren máis discriminación, especialmente as mulleres, e están sistematicamente fóra da esfera pública e os espazos de poder".

Con ocasión deste 600º aniversario, e da celebración de 8 de abril, Día Internacional do Pobo Xitano, o Parlamento galego quérese sumar ao compromiso dos poderes públicos para "avanzar na igualdade e o recoñecemento do pobo xitano", un recoñecemento que pasa por "preservar e promover o seu patrimonio cultural, a súa historia e a súa cultura, así como os símbolos de identidade".

"600 ANOS DE HISTORIA COMPARTIDA"

Para avanzar en igualdade, deféndese que é precisa "unha resposta decidida" fronte á pobreza e á desigualdade estrutural que "impiden o progreso social do pobo xitano". Por último, convídase o conxunto da sociedade a coñecer a historia e a cultura do pobo xitano, os valores e tradicións sobre os que se sustenta a súa identidade. "Convidámosvos a celebrar xuntos estes 600 anos de historia compartida", conclúe.

Fachada principal do Pazo do Hórreo, sede do Parlamento de Galicia | Fonte: Parlamento de Galicia - Arquivo