Sanidade agarda que o traslado dos servizos do hospital Materno de Ourense finalice ao comezo de verán

O conselleiro de Sanidade, Antonio Gómez Caamaño, afirmou este mércores que os traballos para o traslado provisional da hospitalización do Materno Infantil de Ourense comezaron este luns co obxectivo de que finalicen ao comezo do verán, despois de que o pasado mes de marzo se derrubase parte dun falso teito do edificio. En resposta a preguntas do PPdeG e do PSdeG no Parlamento, o responsable de Sanidade defendeu que os técnicos sosteñen que a estrutura "é estable" pero que "hai que reforzar os falsos teitos".

Detallou que os traballos se realizarán por fases para interferir o menos posible na actividade asistencial. Así, farase unha pequena intervención na planta 0 de consultas do Materno, o traslado da Unidade de Coidados Paliativos a Piñor e a recolocación da área de dirección. Ademais, parte dos quirófanos de cirurxía maior ambulatoria do primeiro piso do edificio cirúrxico acollerán os paritorios e un dos novos módulos da UCI converterase en UCI pediátrica e neonatal. Así mesmo, vanse instalar dúas unidades móbiles do Servizo Galego de Saúde equipadas como quirófanos con todo o instrumental necesario para garantir a asistencia.

"Anticipar ese traslado e recolocar consideramos que é a decisión máis sensata, eficaz e áxil; planificar a reorganización e adiantar o seu traslado", reivindicou o conselleiro. Tras a intervención de Gómez Caamaño, a deputada do PPdeG Noelia Pérez manifestou que "mentres uns esaxeran e non propoñen nada", o Goberno galego "traballa para que Ourense teña unha sanidade digna e moderna". "Nós, a traballar; as manifestacións deixámosllas a outros, ao nacionalismo e organizacións satélites e ao PSOE galego convertido en peóns da estratexia nacionalista", criticou. Pola súa banda, a socialista Carmen R. Dacosta censurou que a Consellería "abordou o problema" do centro ourensán "de maneira errónea desde o inicio". "Houbo que esperar a ver que a casa se caía a anacos para entender que era necesaria unha nova", lamentou.

"DEBERÍAN REFLEXIONAR"

A continuación, o conselleiro de Sanidade reprochou ao PSdeG que "nunca achegan solucións" e que "desprestixian a sanidade pública". "Deberían reflexionar sobre a súa actitude e estratexia política se queren deixar de ser algunha vez segunda forza política da oposición. Mentres fan seguidismo dos do 'non', na Xunta dicimos si á mellora continua da sanidade", subliñou Gómez Caamaño. Por último, o tiular de Sanidade quixo recoñecer publicamente o traballo da xerencia da área sanitaria para presentar unha planificación "de recolocación que permite garantir a mellor asistencia" e "en constante diálogo cos profesionais".

ORZAMENTOS PARA OURENSE

O tema do derrube de parte do falso teito do Materno Infantil de Ourense tamén o sacou este mércores o deputado de Democracia Ourensana, Armando Ojea, na súa intervención para formular ao conselleiro de Facenda unha pregunta sobre as razóns para "non asignar a Ourense unha partida orzamentaria de 24 millóns non executada en Vigo". Na súa exposición, Ojea explicou que a falta de execución desta partida para un edificio en Vigo impide que eses fondos se empreguen de "forma eficiente", mentres unha cidade como Ourense "ten grandes necesidades en materia de infraestruturas deportivas e sanitarias", entre as que puxo como exemplo o Hospital Materno Infantil que, engadiu, "está a caer a anacos".

Pola súa banda, Miguel Corgos dixo non estar de acordo coa argumentación do parlamentario ourensán, defendendo que o Goberno galego "non actúa con criterios de cotas territoriais, senón con necesidades". "En calquera concello hai proxectos que se executan con máis facilidade e outros con máis dificultades, o compromiso do Goberno galego cando planifica un investimento é mantelo, dialogar e desbloquear a situación, en ningún caso queremos que unha complicación nunha execución penalice aos cidadáns", xustificou.

Traballos no Hospital Materno Infantil de Ourense | Fonte: XUNTA