O Sergas nega "realidades macabras" na atención sanitaria do Condado e A Paradanta
O BNG denuncia que a área de Vigo é "un campo de experimentación de políticas de recortes do PP".
Por Europa Press / Redacción | SANTIAGO DE COMPOSTELA | 10/04/2025 | Actualizada ás 16:24
O BNG denunciou "caos e colapso" na atención sanitaria en puntos de atención continuada de Ponteareas e A Cañiza, así como en centros de saúde das comarcas do Condado e A Paradanta, con esperas de ata 20 días para acceder ao pediatra. En resposta, o xerente do Servizo Galego de Saúde, José Ramón Parada, sostén que "a realidade non é tan macabra como pretende facer o seu partido".
Na Comisión de Sanidade, Cristina Fernández Davila (BNG) denunciou que a área de Vigo é "un campo de experimentación de políticas de recortes do PP". Relatou diversos exemplos de "colapso" por falta de persoal, como unha persoa en atención primaria en Ponteareas que pediu cita o 4 marzo e non ten ata o 26 de abril, así como outra persoa con máis dun ano de espera para un psicólogo.
O xerente do Servizo Galego de Saúde, José Ramón Parada, sinalou que hai un problema de falta de médicos xeral en España, polo que é o Ministerio o que ten que "tomar medidas urxentes". Así mesmo, defendeu que se "tomaron múltiples medidas" e garante que todos os nenos destas comarcas teñen a atención pediátrica garantida, con cotas por baixo do cociente recomendada polo Ministerio, que fixa óptimo entre 1.250 e 1.500.
Así, o xerente do Sergas expón que se adxudicou na última oferta de emprego de difícil cobertura un total de sete prazas de médico de familia (3) e pediatría (4) en O Condado e A Paradanta. Parada lembrou que a Consellería de Sanidade avanza nun plan de recursos humanos que ofrecerá un mapa de persoal dispoñible e necesario a medio e longo prazo. Tamén lembra que o Concello de Ponteareas aprobou a modificación do Plan Xeral de Ordenación Municipal que permitirá iniciar vos trámites para que a Xunta licite a redacción do proxecto do novo centro de saúde no municipio.
HOSPITALIZACIÓN A DOMICILIO EN MONFORTE
Noutra pregunta, Iago Suárez (BNG) advertiu de que o hospital de Monforte fai "méritos" para "ser o peor" de Galicia, "competindo" con O Barco, pola falta de dotación da Xunta, entre o que inclúe persoal insuficiente para o servizo de hospitalización a domicilio en Lemos.
En resposta, Parada di que o hospital de Monforte conta cun equipo de hospitalización a domicilio cun facultativo e tres enfermeiras que ofrecen un servizo "de maneira adecuada". Expón que o ano pasado realizáronse 2.211 visitas a domicilios en Lemos, das 676 foron de médico e enfermeira, 1.440 de enfermeira e 95 só de médico.
