Conta atrás para as xornadas 'Primavera de Portas abertas' da Ruta do Viño de Valdeorras
Celebraranse do 9 ao 11 de maio ofertándose 16 actividades que inclúen, entre outras cousas, excursións, visitas guiadas a adegas e lugares emblemáticos, catas e experiencias gastronómicas.
Por Galicia Confidencial | O Barco de Valdeorras | 30/04/2025 | Actualizada ás 17:30
A Ruta do Viño de Valdeorras ultima os preparativos para a nova edición da “Primavera de Puertas Abertas”, que se celebrará do 9 ao 11 de maio. Esta iniciativa, que forma parte do programa de promoción das Rutas do Viño de Galicia, ofrece unha completa axenda de actividades deseñadas para atraer visitantes e poñer en valor o enoturismo na comarca.
Mantendo o compromiso de promocionar o territorio a través do desenvolvemento do enoturismo, a Ruta do Viño de Valdeorras preocuparase de salientar a calidade dos seus viños e a riqueza patrimonial, paisaxística e gastronómica do seu territorio. Durante esa fin de semana, Valdeorras ofrecerá un total de 16 actividades que inclúen a participación de 12 adegas e oito roteiros de buses do viño que chegarán desde cidades como Vigo, Santiago ou Ponferrada (xa están completas as reservas).
PROGRAMA DE ACTIVIDADES
A organización oferta unha chea de posibilidades para gozar do 9 ao 11 de maio. Dende visitas guiadas a lugares emblemáticos como o Castelo Medieval do Bolo, o Santuario barroco de As Ermidas ou as antigas minas de wolframio; ata catas en covas tradicionais, paseos xunto ao río Sil e roteiros en segway por viñedos ou excursións ao Parque Natural Serra da Enciña da Lastra. A programación complétase con experiencias gastronómicas como un showcooking a cargo dun chef Marco Varela da Asociación Grupo Cociña Ourense e o director técnico da D.O. Jorge Mazaira, unha cata maridaxe de viños tostados e espumosos dirixida pola enólogoa/enóloga Cecilia Fernández, e unha cea cóctel nun balcón sobre o Sil.
O programa completo de actividades está publicado na web da Ruta do Viño de Valdeorras.
AGRADECEMENTOS
A organización agradece especialmente a implicación de adegas, que se poden visitar durante esta fin de semana de maneira gratuíta, establecementos hostaleiros, restaurantes e empresas locais, así como o respaldo continuado da Axencia de Turismo de Galicia, que colabora activamente nesta iniciativa desde fai catorce edicións.
