O Xulgado de Ourense impón unha orde de afastamento dunha nai ao seu fillo tras unha denuncia por malos tratos

O Xulgado de Instrución número 3 de Ourense decretou este luns unha orde de afastamento contra unha muller acusada polo seu fillo de malos tratos, despois de que o menor denunciase ter sido atado e encerrado nun baño cunha bolsa na cabeza. A medida establece que a nai non poderá achegarse a menos de 200 metros do neno, do seu fogar nin de ningún lugar onde este se atope. Tamén se lle prohibe calquera tipo de comunicación co menor durante a tramitación da causa.

A decisión foi adoptada tras unha comparecencia na que participaron as partes implicadas e a Fiscalía. Segundo fontes do Tribunal Superior de Xustiza de Galicia (TSXG), o xuíz rexeitou ditar unha orde semellante para os avós maternos, ao non considerar probado o seu envolvemento nos feitos.

A garda e custodia do menor, solicitada polo pai, non foi concedida por agora. O maxistrado indicou que "neste momento procesual non existen elementos suficientes para resolver sobre esa cuestión".

O neno, de oito anos, atópase baixo tutela da Xunta de Galicia, que asumiu a súa protección o pasado 14 de maio mediante unha resolución de urxencia. A patria potestade dos dous proxenitores permanece suspendida de forma cautelar.

Os feitos saíron á luz esta fin de semana, cando o menor logrou contactar cos servizos de emerxencias tras escapar da situación de risco na que se atopaba. Segundo fontes coñecedoras do caso, foi el mesmo quen chamou ao 112, o que activou a intervención da Garda Civil, que o trasladou ao Complexo Hospitalario Universitario de Ourense (CHUO), onde se lle detectaron lesións físicas compatibles con malos tratos.