Asociacións pro Palestina critican as reunións do goberno galego coa embaixada israelí e piden un boicot

O Foro Galego de Inmigración elaborou un documento, asinado por distintas asociacións pro Palestina, no que demanda campañas de boicot e sancións sobre Israel tras as reunións da vicepresidenta do Parlamento galego, Elena Candía, e o director xeral de Relacións Exteriores da Xunta, Jesús Gamallo, co encargado de negocios da embaixada israelí en España e embaixador en funcións, Dan Poraz.

Tal e como trasladou o organismo nunha nota de prensa, os asinantes queren mostrar o seu "total rexeitamento" á guerra en Gaza, a cal está a ser denunciada pola "maioría da sociedade" en "manifestacións non violentas" e outros "actos de solidariedade" co "sufrimento do pobo palestino".

Nesta liña, solicitaron ao Goberno galego desenvolver campañas xunto a organismos como BDS (Boicot, Desinvestimento e Sancións) para "incrementar a presión económica e política sobre o país" e así acabar coa "colonización sistemática dos territorios palestinos".

Así mesmo, engadiron que fan unha chamada a que se respecten os "dereitos fundamentais" do pobo palestino, "incluído o dereito á libre autodeterminación e á resistencia por todas as vías, incluída a armada, recollida no dereito internacional", apuntaron. O documento, asinado por nove entidades, será entregado á Presidencia da Xunta de Galicia e á Valedora do Pobo.

Reunión do encargado de Negocios da Embaixada de Israel en España, Dan Poraz, e o director xeral de Relacións Exteriores da Xunta de Galicia, Jesús Gamallo | Fonte: XUNTA