Campo Lameiro, Caldas de Reis e Moraña, expectantes ante a identidade dos corpos achados calcinados o sábado
Tal e como avanzou a Subdelegación do Goberno este luns, os labores de identificación dos corpos achados o pasado sábado "van tardar varios días, dado o grao de deterioración no que se atoparon".
Por Europa Press / Redacción | PONTEVEDRA | 02/06/2025 | Actualizada ás 18:03
Os veciños dos municipios pontevedreses de Campo Lameiro, o limítrofe de Moraña e o de Caldas de Reis, situado a tan só 14 quilómetros do primeiro, mantéñense en albas á espera da confirmación oficial das identidades do home e da muller cuxos cadáveres apareceron o pasado sábado nun vehículo no primeiro destes concellos, mentres que dos outros dous poderían ser orixinarias as vítimas. Axentes da Garda Civil acudiron de novo a mañá deste luns ao lugar do achado, onde o vehículo xa foi retirado e xa foi levantada a zona acordoada, na cal só quedan restos de cinza.
Tal e como avanzou a Subdelegación do Goberno este luns, os labores de identificación dos corpos achados o pasado sábado "van tardar varios días, dado o grao de deterioración no que se atoparon". Dentro do coche, segundo fontes coñecedoras do suceso consultadas por Europa Press, atopábase unha muller completamente calcinada e no exterior un home que tiña parte do seu corpo queimado. As hipóteses que existen sobre a identificación son só "rumores", segundo expón o alcalde de Campo Lameiro, Carlos Costa, a Europa Press: "Veciños din que eran dous veciños de Moraña que levaban tempo desaparecidos, pero oficialmente non sabemos nada de momento".
Pola súa banda, o alcalde de Caldas de Reis, Jacobo Pérez, tamén é coñecedor destes "rumores", que apuntan a unha parella na que el era natural de Moraña e ela, de Caldas de Reis: "Os rumores é o que din e estamos á espera de que se confirme a través do ADN ou se desminta, para ter constancia real". Con todo, a ningún dos concellos lles consta unha denuncia oficial por desaparición. No caso do rexedor caldense, si é coñecedor da "desaparición dun home" que traballaba nesta localidade: "No caso de que se confirme que son eles, efectivamente era el", abunda. Desde o centro de traballo deste home puxéronse en contacto coa Policía Local porque "levaba varios días incomunicado e sen aparecer no traballo". "Tentaron localizalo, pero foi imposible", engadiu Jacobo Pérez.
ACHADO DOS CADÁVARES
O sábado, ata o lugar dos feitos achegouse, ademais do alcalde de Campo Lameiro, o alcalde de Moraña, Sito Gómez, e o cura de Campo Lameiro, Fermín Santiago. "Estaba en Pontevedra e chamoume o subdelegado do Goberno para dicirme que apareceran dúas persoas calcinadas no meu concello, así que subín para o sitio", explicou Carlos Costa. O achado, que se produciu ao redor das 12.00 horas do sábado, fixérono "dous irmáns que ían dando un paseo polo monte" no lugar de Caneda, unha zona forestal.
