Traballadores de Einsa Print nas Pontes inician folgas tras a presentación dun ERE

Os traballadores de Einsa Print nas Pontes (A Coruña), empresa situada no polígono de Penapurreira e dedicada ás artes gráficas, secundaron un paro de media hora por quenda en protesta polo que consideran unha "manobra" da dirección. A acción sindical comezou cunha concentración de 14:30 a 15:30 horas ante as instalacións da empresa, segundo confirmou Vicente Vidal, representante de CIG-Industria en Ferrol.

O sindicalista explicou que a decisión de iniciar as mobilizacións xorde tras a presentación dun Expediente de Regulación de Emprego (ERE) por parte da empresa. "Non entendemos os temas de que presenten agora un ERE, cando en febreiro do ano pasado asignamos que a empresa garantía que non había despedimento ata finais do ano que vén", dixo. Segundo a CIG-Industria, nos últimos tempos, o persoal viña observando un patrón preocupante: "A xente estaba a ver que a empresa trasladaba ao comité que estaban a perder clientes seguido" e que "non atopaban novos". Esta situación, indicou, fixo sospeitar aos traballadores que se estaba "preparando unha manobra, ou ben para pechar a planta ou mesmo para minimizala un pouco máis".

INICIO DAS PROTESTAS

Ante a falta dunha data para constituír a mesa de negociación por parte da empresa, e tras aprobar en asemblea a convocatoria de folga, os traballadores decidiron non esperar e iniciar as mobilizacións. "Xusto cando lle comunicamos á empresa que iamos facer efectiva a folga, foi cando nos comunicou que iniciaba un período de consultas este mércores", 18 de xuño, detallou Vicente Vidal.

O sindicalista explicou que esperan que a empresa lles diga "cales son as medidas que teñen pensado acometer". "Mentres non nos demostre o contrario a empresa, a sensación que lle chegou ao persoal é de que a empresa estivo manobrando aí torticeramente para apertar isto, esa sensación que lles dá. Esperemos que non nos equivoquemos", sostivo Vidal. Finalmente, o comité de empresa solicitará reunións coas administracións públicas e o Concello das Pontes, non para "pedir mediar, senón para esixirlles que esixan á empresa que retire o ERE". Para CIG-Industria, a presentación deste ERE nas circunstancias actuais "é do todo ilegal".

Protesta de Einsa Print ante o Consello Galego de Relacións Laborais | Fonte: Arquivo