Propietarios das Fragas do Eume acusan á Xunta de "okupar" a súas terras e ofrecerlle unha "miseria"

Un centenar de propietarios de parcelas nas Fragas do Eume concentráronse este xoves fronte á Delegación da Xunta en Ferrol para reclamar compensacións económicas "xustas" polas "limitacións impostas" ás súas propiedades a raíz do Plan reitor de uso e xestión do Parque Natural das Fragas do Eume.

Os afectados, con terreos na Capela, As Pontes, Cabanas, Monfero e Pontedeume, denuncian que a Xunta lles "toma o pelo" con ofertas de compra "ridículas" e a negación de compensacións. A presidenta da asociación Parque Natural do Eume, Natureza e Desenvolvemento, Ángeles Pita, sinalou que a situación "está estancada" debido á proposta de compra da Xunta.

"A Xunta di que hai moita xente que quere vender, eu non o nego, pero tamén hai outra moita xente que di que é un prezo ridículo o que nos ofrecen", afirmou Pita. A presidenta remarcou que, aínda que a Xunta podería cumprir con quen vendan, con quen "non cumpren de ningunha maneira", é con todos os propietarios que teñen leiras alí e non as venderon nin pensan vendelas por un "prezo irrisorio".

Neste sentido, Pita destacou a existencia de exemplos noutras rexións, como no País Vasco (Parques Naturais de Gorbea e Urkiola) e Andalucía (Doñana), onde se compensa aos propietarios polas limitacións de uso en terras con propiedades consolidadas "de hai séculos".

SANCIÓNS

Así mesmo, Pita denunciou que as limitacións "non só afectan" as zonas de reserva, senón tamén a outras áreas, e mesmo "se están impondo sancións". Un dos propietarios de terreos nas Fragas do Eume, Manolo Varela, afirmou que, neste caso, "os okupas son os propios da Xunta" e remarcou que a propiedade privada "debe ser respectada".

"A nosa propiedade é igual que a dun piso ou a dunha mansión. Temos que limitar a pobreza que temos, pero temos que defendela", aseverou. "Que dean a cara. A defensa vai estar aí férrea. Porque, como digo sempre, somos como o carballo da fraga: somos duros e resistentes", remarcou Manolo Varela. Os propietarios das Fragas do Eume aseguran que seguirán loitando polos seus dereitos, convencidos de que a súa "propiedade consolidada" outórgalles o dereito a ser compensados.

Concentración de propietarios das Fragas do Eume | Fonte: Europa Press