A PDR vincula a prórroga do Goberno Rajoy en Lourizán coa trama de Montoro
A Asociación pola Defensa da Ría lamenta o novo aval do Supremo a Ence: "Non por esperado deixa de causar dor"
Por Europa Press / Redacción | PONTEVEDRA | 26/07/2025 | Actualizada ás 20:26
A Asociación pola Defensa da Ría de Pontevedra (APDR) lamenta a nova sentenza emitida polo Tribunal Supremo que avala a prórroga da concesión dos terreos públicos da pasteira Ence en Lourizán ata 2073: "Unha decisión que, non por esperada, deixa de causar dor e decepción".
Nun comunicado, este colectivo insiste en que a prórroga que aprobou o Goberno de Mariano Rajoy en 2016 "foi absolutamente irregular por contraria ao ben común" e quere "matizar algúns aspectos" sobre o fallo coñecido esta semana, que vai no mesmo sentido que as sentenzas contra outros recursos do Concello de Pontevedra e Greenpeace.
Así, a APDR quéixase de que o Supremo esperase "algo máis de dous anos" para emitir este fallo sobre o seu recurso e considera que é "unha táctica dilatoria para retardar" a actuación da asociación noutras instancias xudiciais. Ademais, sinala que no Supremo houbo dous votos particulares que coinciden co que decidiu a Audiencia Nacional en primeira instancia, que anulara a prórroga.
Así mesmo, a Asociación pola Defensa da Ría vincula a prórroga do Goberno de Rajoy á concesión da fábrica pontevedresa coa presunta "trama corrupta" pola que o exministro de Facenda Cristóbal Montoro está a ser investigado.
E é que nos últimos días transcendeu un pago duns 116.000 euros de Ence a Equipo Económico --empresa fundada por Montoro-- en 2013, ano no que precisamente foi aprobada a reforma da lei estatal de costas de 1988 na que agora se baseou o Supremo para avalar a concesión.
