Por Galicia Confidencial | Compostela | 23/06/2016 | Actualizada ás 17:39
Galicia envellece a un ritmo moi rápido, tanto, que de seguir a tendencia pode converterse nunha das autonomías máis envellecidas do Estado. E é que a diminución da poboación en Galicia volveu acentuarse o ano pasado, cando a comunidade presentou o peor saldo vexetativo por comunidades autónomas, con 12.269 mortes máis que nacementos, segundo o balance provisional do movemento da poboación que publica este xoves o Instituto Nacional de Estatística (INE).
Aínda que a comunidade galega rexistrou o segundo menor descenso dos alumeamento en taxa anual, tras baixar un 1,1% en 2015 respecto a 2014, ata 19.412; do lado contrario situouse en undécimo lugar en canto a incremento das defuncións, que subiron un 5,9%, ata 31.681.
Así as cousas, Galicia obtivo o pasado exercicio a terceira menor taxa bruta de natalidade por comunidades, de 7,1 nacementos por cada 1.000 habitantes. A taxa bruta de mortalidade deixa á comunidade galega en posicións de liderado, en terceiro lugar pola cabeza, con 11,6 defuncións por cada 1.000 habitantes.
Só Asturias (6,2 por cada 1.000) e Castela e León (7 por cada 1.000) teñen unha taxa de natalidade máis baixa que a galega, e unicamente, de novo, estas dúas comunidades (con 13 e 11,9 por cada 1.000, respectivamente) presentan taxas de mortalidade máis elevadas.
82,7 anos de esperanza de vida
Mentres, a esperanza de vida dos galegos é exactamente a mesma que a media, de 82,7 anos, nunha posición intermedia entre os 84 de Madrid e os 81,4 de Andalucía.
No conxunto estatal, a diminución da poboación en España volveu acentuarse o ano pasado cando por primeira vez dende que hai datos anuais, rexistrou un crecemento vexetativo negativo, é dicir, morreron 2.753 persoas máis das que naceron.
O ano pasado naceron en España 419.109 persoas fronte ás 422.276 que morreron. Descontando os nacidos e defuntos non residentes no país, queda un saldo negativo de 2.753 persoas, "a primeira vez que isto sucede dende que se dispón de datos anuais".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.