A 0,09 € a palabra por emitir documentos en galego: o prezo que cobra unha empresa de prevención de riscos laborais
A Mesa pola Normalización Lingüística denunciou que a empresa Taprega Prevención de Riscos Laborais pretenda cobrar por emitir documentos en galego a nove céntimos por palabra, segundo lle indicou a firma a un cliente que solicitou o papelorio traducido.
Por Europa Press / Redacción | SANTIAGO DE COMPOSTELA | 28/07/2025 | Actualizada ás 21:58
A Mesa pola Normalización Lingüística denunciou que a empresa Taprega Prevención de Riscos Laborais pretenda cobrar por emitir documentos en galego a nove céntimos por palabra, segundo lle indicou a firma a un cliente que solicitou o papelorio traducido. Nun comunicado, A Mesa explicou que tras coñecer estes feitos, solicitou a Taprega que ofreza á súa clientela en Galicia os textos en galego "sen custo adicional". Con todo, a compañía respondeu que "cumpre coas súas obrigacións legais entregando toda a documentación requirida en castelán".
"A tradución integral de documentación técnica supón un servizo adicional que, na actualidade, non é obrigatorio por lei nin está incluído nas condicións estándar dos contratos", afirmou a empresa. Respecto diso, a directora do Observatorio de Dereitos Linguísticos, Elsa Quintas, reivindicou que as empresas privadas que prestan os seus servizos en Galicia están "obrigadas" a respectar os dereitos lingüísticos da cidadanía galega. "Os consumidores teñen dereito a usar calquera das linguas oficiais da Comunidade, a condición de que a contratación realizar ou o seu consentimento se manifeste no territorio da Comunidade", reivindicou Quintas.
