Organizacións antitaurinas denuncian o "acceso de menores" ás corridas de touros en Pontevedra

A Fundación Franz Weber e a plataforma Galicia, Mellor Sen Touradas anunciaron o rexistro dunha 'Pregunta de Iniciativa Popular' no Parlamento de Galicia "para denunciar o acceso de persoas menores ás corridas de touros programadas para este fin de semana na cidade de Pontevedra". Nos seus motivos sinalan que o Comité dos Dereitos do Neno de Nacións Unidas "especificamente para España e Portugal, pronunciouse de forma expresa en contra de que os menores poidan ser expostos á violencia taurina" e lembran a exposición feita a este respecto.

Ademais, insisten en que "o criterio de protección da infancia dos contidos nocivos ou negativos debe prevalecer, por tanto, sobre os espectáculos taurinos en directo, nunha praza ou evento realizado na vía pública, nun medio de comunicación ou en espazos como Internet". No apartado de preguntas, que debe asumir un parlamentario ou parlamentaria para dar a súa resposta por parte da Xunta, ambas as organizacións requiren información sobre a adaptación do marco normativo autonómico a este respecto.

Cadea humana na praza de touros de Pontevedra en 2013 en contra das corridas