Greenpeace documenta desde o aire a devastación dos incendios de 2025

Greenpeace, xunto co fotógrafo social e ambiental Pedro Armestre, documentou desde o aire as zonas máis afectadas polos incendios de 2025 nas provincias de Ourense, León e Zamora. As imaxes permiten observar a magnitude da destrución e inclúen áreas ata agora non fotografadas, como Sanabria, O Bierzo ou comarcas ourensás como Larouco, Oímbra-Xinzo de Limia e Chadrexa de Queixa-Vilariño de Conso.

O ano 2025 é un dos peores rexistrados en incendios forestais, con case 400.000 hectáreas calcinadas, cifras só superadas en anos como 1985, 1978, 1994 e 1989. Greenpeace destaca que a media de superficie queimada por cada gran incendio forestal (GIF) alcanzou as 6.100 hectáreas, catro veces máis que a media histórica, e oito dos dez lumes máis grandes deste século ocorreron este ano.

As fotografías amosan o impacto sobre vivendas, pobos, explotacións agrícolas e gandeiras, negocios e espazos naturais protexidos, reflectindo unha traxedia ambiental e social. Ata agora, oito persoas faleceron, máis de 50 resultaron feridas e máis de 30.000 tiveron que ser desaloxadas. Pedro Armestre subliñou que “desde o aire, o que se ve non é só terra queimada: son fogares perdidos, paisaxes convertidas en cinza e un futuro que se apaga”.

Mónica Grella de Diego, responsable da campaña de incendios forestais de Greenpeace, calificou 2025 como un ano histórico e urxiu á xestión das masas forestais e á elaboración dun pacto de Estado con folla de ruta nacional para prevención e control de incendios. Reclamou compromisos vinculantes, financiamento estable, participación cidadá, rendición de contas e atención especial ás persoas máis vulnerables.