O PSdeG levará a Bruxelas a xestión que a Xunta fixo dos incendios

O eurodeputado do PSdeG-PSOE, Nicolás González Casares, levará a xestión dos incendios ao Parlamento Europeo e preguntará á Comisión polos "incumprimentos" da Xunta coa Rede Natura 2000 e a directiva de hábitats.

Nunha rolda de prensa acompañado da deputada autonómica socialista Paloma Castro, González Casares avanzou catro iniciativas na Eurocámara e criticou duramente a política ambiental do Goberno galego, que son resultado de "40 anos de clientelismo". Así, preguntará á Comisión por se a xestión da Rede Natura 2000 cumpre coa mencionada directiva e se a aprobación dos plans directores "podería mellorar" a protección destas zonas contra o lume.

Neste contexto, o eurodeputado socialista tamén dá un tirón de orellas ao Executivo comunitario porque a "demora de anos" no procedemento de infracción aberto contra o Estado español por estes incumprimentos nas comunidades autónomas e se contempla levalo aos tribunais europeos. Así mesmo, solicitará á Comisión os datos do satélite 'Copernicus' para saber non só a superficie queimada con exactitude, senón tamén como estaba Pena Trevinca o 18 de agosto: "Sabiamos que ardía, pero non pola Xunta, e de súpeto apareceron 3.000 hectáreas queimadas. Queremos saber que se nos escondeu".

OS INCENDIOS, "PROBA DA INCOMPETENCIA" DE RUEDA

O eurodeputado dixo que os incendios do pasado agosto son "a proba da incompetencia" do presidente galego, Alfonso Rueda, ao que acusou de "ignorancia ou mala fe" por dicir, o pasado luns, que a maioría de superficie queimada eran "rocas e matogueiras".

Ademais, os socialistas foron especialmente críticos coa conselleira de Medio Ambiente e Cambio Climático, Ángeles Vázquez, á que rebautizou como conselleira "de Altri", de "desprotección e exterminio da biodiversidade", de "chiringuitos riquiños" e de "xara e sedela" por reaparecer días atrás para anunciar axudas acompañada da Federación Galega de Caza.

DIMISIÓNS

Pola súa banda, a portavoz nacional do BNG, Ana Pontón, volveu a pedir este venres a dimisión do presidente da Xunta, Alfonso Rueda, pola súa "xestión neglixente", a súa "manipulación" e as súas "mentiras" durante a vaga de incendios do pasado mes de agosto. "Tivemos a un goberno desbordado, que fixo unha xestión neglixente da vaga de incendios e o máximo responsable disto é o señor Rueda", asegurou a dirixente nacionalista, ao ser preguntado polos medios nunha rolda de prensa no Parlamento.