CIG-Ensino denuncia "recortes" e "precarización" laboral en centros educativos

O sindicato CIG-Ensino denunciou a "política de recortes continuos" da Consellería de Educación e como resposta lembrou a protesta convocada para este sábado, día 13, en Santiago, así como unha folga o día 25. A central nacionalista celebrou este mércores senllas roldas de prensa para avaliar as carencias do inicio de curso por comarcas. No caso de Santiago e municipios da súa área de influencia, o secretario comarcal, Rubén Monteagudo, enumerou varios colexios nos que o curso comezou con mobilizacións ante os "recortes" da Xunta e mostroulles o seu apoio.

Mencionou o caso do CEIP Monte dos Postes e do López Ferreiro, ambos na capital; o CEIP Rodríguez Cadarso de Noia; o CPI Dos Dices de Rois; a escola de Infantil do Milladoiro, en Ames; o CEIP Pedrouzos de Brión e o CEIP de Melide. A isto sumou os peches de tres escolas unitarias na zona --a de Muros e as de Queiruga e Seráns, en Porto do Son-- e as vacantes "sen cubrir" a inicio de curso no IES Poeta Añón, o IES Xulián Magariños, o IES Marcías O Namorado, o IES de Arzúa, o IES Virxe do Mar, o IES Terra de Xallas e o CIFP Politécnico.

Neste contexto, a maiores da manifestación e a folga xa convocadas, Monteagudo prevé un inicio de curso no que se vaian incrementando as mobilizacións co obxectivo de "recuperar" dereitos arrebatados, "rectificar" os cocientes de alumnos por aula e "recoñecer" o labor docente, tanto a nivel retributivo como de "dignificación". Sobre estas denuncias, o conselleiro de Educación, Román Rodríguez, alegaba que eran "incidencias normais" do inicio de curso e que se liquidarían nos próximos días, pero Monteagudo respondeu que xa tiñan que estar solucionadas "en maio ou xuño": "O normal é que os centros empecen con todo o persoal".

"DATOS FALSOS"

Na rolda de prensa en Santiago, Ana Rodiño, membro da executiva federal do sindicato, denunciou que a Consellería traslada "datos falsos" sobre o número de profesores. E é que, nos últimos días, a Xunta afirmaba que este curso haberá en Galicia un total de 31.756 docentes, a cifra "máis alta da historia", tras un incremento de 153. "Isto non coincide cos datos obxectivos", advertiu Rodiño, porque o número de profesores que hai orzados (30.424) levan "máis de catro anos" sen variar. Si houbo un aumento dos de FP, pero "enténdese que en detrimento do resto de corpos". Ademais, afeou á Xunta que acabase este ano co concurso de atención preferente e que os docentes de apoio incorporados ao amparo do chamado Plan Mega, "sustentado desde Europa e o Ministerio de Educación", estean a empregarse "para crear prazas ordinarias".

"RECORTES" EN FERROLTERRA

A secretaria comarcal de CIG-Ensino, Andrea Martins, afirmou que a situación actual "non é diferente a outros anos" en Ferrolterra e que os centros educativos seguen "sufrindo recortes, sobre todo en persoal". Segundo o sindicato, estas políticas "non só non melloran" as condicións laborais do profesorado, senón que tamén "pon en risco a calidade do ensino público". "Defendemos a dignidade do noso traballo e por iso queremos ir á rúa", declarou Martins. Martins puxo sobre a mesa varios exemplos da situación que, segundo a CIG-Ensino, vívese nas escolas e institutos da comarca. Mencionou a polémica polas "habilitacións" en centros como o CEIP de Canido ou o CEIP de San Xoán de Filgueira, ambos de Ferrol, onde a "falta de desdobres obriga aos docentes a asumir unha carga excesiva".

REDUCIÓN DE PRAZAS

Pola súa banda, Teresa Carballido destacou que a redución das horas lectivas en Infantil e Primaria "non foi acompañada dun aumento de persoal", o que se traduce nunha "maior carga de traballo" e na "perda de apoios necesarios para o alumnado". Así mesmo, Carballido salientou que as protestas convocadas non é para "traballar menos", senón para "traballar mellor" e en "mellores condicións". Finalmente, o sindicato puxo de manifesto a "falta de seguridade" nalgúns centros educativos. Martins aludiu ao caso do CEIP A Gándara, en Narón, onde "caían pedras dentro das aulas". Aínda que a Xunta anunciou que licitará obras, a CIG-Ensino reclama unha lista de prioridades pública e transparente para "garantir a seguridade de docentes e alumnos". "O que non pode ser é que para silenciar as protestas, digan que en tres meses farano", concluíu Martins.