Propietarios de leiras nas Fragas do Eume esixen compensacións á Xunta tras unha "ocupación" de 28 anos

Propietarios de leiras dentro do Parque Natural Fragas do Eume concentráronse na mañá deste xoves, ante o edificio administrativo da Xunta en Ferrol, para reclamar á Administración autonómica compensacións económicas polas limitacións que sofren nas súas parcelas. A protesta prodúcese tras 28 anos do que a asociación cualifica como "ocupación" dos seus terreos sen ningún tipo de acordo.

Ángeles Pita Balsa, presidenta da Asociación Parque Natural Fragas do Eume, Natureza e Desenvolvemento, denunciou que a Xunta "padece xordeira, non escoita, non atende" as demandas dos propietarios. Segundo Pita, un grupo de representantes reuniuse coa administración hai uns meses e presentáronlles unha serie de propostas, pero non recibiron resposta algunha.

A portavoz dos propietarios lamentou a falta de iniciativa da Xunta para chegar a un acordo. Sinalou que o Goberno galego optou por mercar terreos a prezos que non consideran xustos e que non teñen en conta o valor patrimonial das leiras. "A xente vende chan, pero non se está compensando nin a situación ecosistémica, non se está contemplando o patrimonio que hai, nin o industrial, nin o das mámoas, nin o dos muros", afirmou.

Pita Balsa asegurou que noutras comunidades, como no País Vasco, aplícanse compensacións pola perda de renda, algo que non sucede en Galicia. A asociación considera que a situación actual é unha "ocupación", xa que os propietarios vense impedidos de realizar case calquera actividade nos seus terreos. "Levamos así desde o ano 2023, esperando que nos escoiten, pero non moven ficha", concluíu a presidenta, que asegurou que seguirán loitando ata que se lles faga xustiza.

Concentración de propietarios das Fragas do Eume | Fonte: Europa Press - Arquivo