Galicia prepara alegacións ao Plan Estatal de Vivenda
A Xunta critica que o documento do Ministerio chega tarde e non recolle as propostas das comunidades autónomas.
Por Europa Press / Redacción | Santiago de Compostela | 19/09/2025 | Actualizada ás 17:55
A Xunta de Galicia presentará nos próximos días alegacións ao documento enviado esta semana polo Ministerio de Vivenda e Axenda Urbana que recolle o articulado do futuro Plan Estatal de Vivenda, posto que non recolle as propostas facilitadas polas comunidades.
Nun comunicado, a conselleira María M. Allegue critica que o documento "chega tarde", "o que pon en perigo a convocatoria de varias liñas de axuda". Considera que isto é unha "irresponsabilidade" do Goberno central nun contexto no que o acceso á vivenda é a "principal preocupación" da cidadanía.
"Falamos dun documento que non conta coa participación das CCAA. O Ministerio trata, así, de impor modos de actuación e medidas que, en moitas ocasións, non son acordes coas liñas de actuación das comunidades. En lugar de buscar coordinación, opta por actuar de forma unilateral", denunciou.
A titular do departamento autonómico apunta tamén que o plan modifica a firma de financiamento dos plans anteriores, que pasa dunha financiacón "voluntaria" de menos do 30% a unha achega obrigatoria do 40%.
Con todo, avanzan que aceptan as condicións, aínda que matizando que "non se pode aprobar un plan que non estea acordado coas comunidades, que son as que teñen as competencias".
