O sindicato CC.OO. Servizos presentou o seu Informe de Turismo en España 2025, no que alerta da precariedade laboral que sofren as mulleres no sector turístico, con diferenzas salariais de entre o -13% e o -15% respecto aos homes.
Segundo o documento, o turismo emprega arredor de 3,2 millóns de persoas afiliadas á Seguridade Social, mais persiste unha situación de desigualdade especialmente visible en ramas como a restauración. Neste segmento, as mulleres perciben unha media de 14.000 euros brutos anuais, o que supón case a metade do salario medio estatal (27.200 euros) e mesmo un 15% por baixo do salario mínimo interprofesional (SMI).
As mulleres representan o 57% do persoal no sector turístico e, dentro deste grupo, o 29% son migrantes. O sindicato apunta que se concentran en postos como camareiras, cociñeiras ou axudantes de cociña (80% do total), cunha presenza destacada de mozas entre 25 e 34 anos (28%).
CC.OO. advirte de que estas condicións supoñen unha discriminación múltiple: "Precisamente por ser mulleres, mulleres estranxeiras, mulleres maiores de 45 anos ou aínda novas, e mulleres que desempeñan profesións tradicionalmente menosprezadas e con escaso ou nulo recoñecemento social, convérteselles nun colectivo discriminado no mercado de traballo, tanto por cuestión de xénero, como de raza, como de idade".
O informe tamén chama a atención sobre o sector hoteleiro, onde a maioría son mulleres que asumen longas xornadas, traballo en festivos e grandes cargas físicas, sen que iso se traduza en recoñecemento social nin en melloras salariais.
CC.OO. reclama un cambio estrutural para rematar coa que cualifica como "persistente precariedade" e avanzar cara a unha remuneración digna e igualitaria para as traballadoras do turismo.
